ASTANA. 22 maýsym. Oblys ákimi Qyrymbek Kósherbaev 23 maýsym – «Qazaqstan polısııasy kúni» merekesine oraı ishki ister salasynda san jyldar boıy qyzmet etken ardagerlerin qabyldap, aldaǵy merekelerimen quttyqtady. Bul týraly oblys ákimdiginiń baspasóz qyzmeti habarlady.
Jıynda aımaq basshysy: «Sizder sanaýly ǵumyrlaryńyzdy elimizdiń tynyshtyǵyna, qylmyspen kúresýge arnadyńyzdar. Oblysymyzdyń ósip-órkendeýine, áleýmettik turaqtylyǵyna úlken úles qostyńyzdar. Qazirdiń ózinde eńbek demalysynda júrgenderińizge qaramastan, ártúrli sharalarda qoldan kelgen kómekterińizdi jasap, ásirese qoǵamdyq ómirge belsene qatysyp, óskeleń urpaqqa ózderińizdiń atalyq tálim-tárbıelerińizdi berip kele jatyrsyzdar. Osy úshin sizderge úlken rızashylyǵymdy aıtamyn», – dep lebizin bildirdi.
Sonymen qatar, kezdesý barysynda Qyrymbek Kósherbaev jas polısııa qyzmetkerlerine úlgi-ónege kórsetip, jas kadrlardy tárbıeleýge at salysqandary úshin ishki ister organdarynyń bir top ardagerin Qyzylorda oblysy ákiminiń «Qurmet gramotasymen» jáne «Alǵys hatymen» marapattap, syı-qurmet kórsetti.
Búginde oblysta ishki ister departamentinen qurmetti eńbek demalysyna shyqqan 1436 ardager bar.
Aıta keteıik, ardagerlerdiń atynan ishki ister organdary ardagerler keńesiniń tóraǵasy Myltyqbaı Peıisov kórsetilgen qurmetke rızashylyǵyn bildirdi.
Talǵat Raıymbek.
Derek, sýret: oblys ákimdiginiń baspasóz qyzmeti.
