Aqmolada polıseı aldymen áıelin, sosyn ózin atyp óltirdi

  ASTANA. 4 shilde. Aqmola oblysynda polıseı áıeli men ózin atyp óltirdi. Osyǵan baılanysty qylmystyq is qozǵaldy. Bul týraly ras.kz habarlady. Aqmola oblystyq ishki ister departamenti baspasóz qyzmetiniń jetekshisi Gúlnar Pınchýktyń basylymǵa bergen deregine qaraǵanda, Bulandy aýdandyq ishki ister bóliminiń qyzmetkeri áýeli áıelin, sodan soń ózin atyp óltirgen. «Tótenshe jaǵdaı Makınsk qalasynda oryn aldy. Ol jónindegi aqpar aýdandyq bólimniń kezekshi bólimine kelip túsken», – dedi Gúlnar Pınchýk. Áıeli men ózin atyp óltirgen polısııa qyzmetkeriniń jasy 31-de bolǵan, polısııa kapıtany shenindegi ol ýchaskelik ınspektordyń kómekshisi bolyp qyzmet istegen. Qaza tapqan jubaılardyń artynda úsh jasar balalary qalǵan. «Oqıǵa ornyna tergeý-jedel toby, sondaı-aq ózindik qaýipsizdik basqarmasy men Aqmola oblystyq ishki ister departmentiniń basshylyǵy shuǵyl attandy. Qylmystyq kodekstiń 99-baby, 1-bóligi boıynsha qylmystyq is qozǵaldy», – degendi qosty Gúlnar Pınchýk. Baspasóz qyzmetiniń basshysy sonymen birge tergeý tolyq aıaqtalǵanǵa deıin «atalmysh tótenshe jaǵdaıdyń jaıy men sebepteri týraly bir nárse aıta qoıý qıyn» ekenin eskertip ótti. «Tergeý nátıjeleri týraly BAQ-tarǵa qosymsha habarlaımyz», – dedi ol. Aıta ketýimiz kerek, Aqmola oblysynda osyǵan uqsas oqıǵa bıylǵy kóktemde de oryn alǵan bolatyn. Selınograd aýdandyq ishki ister bóliminiń 24 jastaǵy tergeýshi kelinshegi 25 naýryzda ózin ózi óltirdi. Aǵa leıtenant jumys kabınetinde tabeldik qarýmen ózin ózi atqan. Anyqtalmaǵan resmı derekter boıynsha, polısııa qyzmetkeriniń sýısıd jasaýyna otbasylyq kıkiljiń áser etken. Talǵat Raıymbek. Derek, sýret: ras.kz.