- Parıjde jeńil atletıkadan «Gaýhar lıgasynyń» kezekti kezeńi márege jetti. Jarysta elimizden bir ǵana sportshy, Nadejda Dýbovıskaıa óner kórsetti. Jerlesimiz bıiktikke sekirýde 178 santımetrlik nátıjemen 13-orynda qalyp qoıdy. Bul básekede aýstralııalyq Nıkola Olıslagerse aldyna jan salmady. Kúmis pen qola medaldy ýkraınalyq Iаroslava Magýchıh (197 sm) pen jasyl qurlyqtyń taǵy bir ókili Elınor Patterson (197 sm) ıelendi.
- Keshe Horvatııanyń Zagreb qalasynda ústel tennısinen «WTT Contender Zagreb» atty iri halyqaralyq týrnıri bastaldy. Osy jarysqa álemdik reıtıngte joǵary orynda turǵan Tomokazı Harımoto (Japonııa, ITTF reıtınginde 4-oryn), Sıan Pen (Qytaı, 9), Darko Iorgıch (Slovenııa, 10), Benedıkt Dýda (Germanııa, 11), An Djehıon (Ońtústik Koreıa, 17), Oh Djýnsýng (Ońtústik Koreıa, 19) syndy sańlaqtar qatysady. Qazaq eli namysyn Dastan Kenjeǵulov, Aıdos Kenjeǵulov, Sanjar Jubanov qorǵaıdy.
- Lozannada Halyqaralyq Olımpıadalyq komıteti (HOK) prezıdentiniń ókilettigin tabystaý rásimi ótti. 2013 jyldan beri osy uıymdy basqaryp kelgen Tomas Bah óz ókilettigin Kırstı Koventrıge resmı túrde tapsyrdy. HOK-tiń jańa basshysy 1983 jyly Zımbabvede dúnıege keldi. Júzýden Olımpııa oıyndarynda 7 (2 altyn+4 kúmis+1 qola), álem chempıonattarynda 8 (3+5+0) ret jeńis tuǵyryna kóterildi. Mansabyn aıaqtaǵannan keıin Koventrı hanym Zımbabveniń Jastar, sport, óner jáne demalys mınıstri, HOK-tiń atqarý komıtetiniń múshesi, uıymnyń sportshylar komıssııasynyń tóraǵasy qyzmetterin atqardy.
- Ulybrıtanııada «Ýımbldonnyń» irikteý saıystary bastaldy. Bul jarysta elimizdiń tórt tennısshisi baq synap, úsheýi kelesi kezeńge ótti. Tusaýkeser kezdesýlerinde Tımofeı Skatov ıtalııalyq Stefano Napolıtanony (ATR№684), Mıhaıl Kýkýshkın brazılııalyq Tıago Ýaıldy (№120), Beıbit Juqaev ýkraınalyq Vıtalıı Sachkony (№213) utty. Dmıtrıı Popko argentınalyq Roman Andres Býrrýchadan (№133) jeńildi. Al álemdik reıtıngte TOP-100-diktiń qataryndaǵy Aleksandr Býblık pen Aleksandr Shevchenko, Elena Rybakına men Iýlııa Pýtınseva týrnırdiń negizgi bóligine birden joldama aldy.
- Tennısshilerdiń álemdik reıtıngi qaıta jańartyldy. Galledegi dodada nebir myqty qarsylasty qapy qaldyryp, bas júldeni oljalaǵan Aleksandr Býblık birden 15 satyǵa joǵarylap, qazirgi kezde 30-orynda tur. Aleksandr Shevchenko 97-ornyn saqtap qaldy. ATR tiziminde ıtalııalyq Iаnnık Sınner kósh bastap tursa, ony ıspanııalyq Karlos Alkaras, germanııalyq Aleksandr Zverev, ulybrıtanııalyq Djek Dreıper, serbııalyq Novak Djokovıch ókshelep keledi.
Áıelder arasynda belarýstik Arına Sobolenko aldyna jan salar emes. Odan keıingi oryndarǵa AQSh-tyń qos úzdigi – Koko Gaýff pen Djessıka Pegýla, qytaılyq Chjen Sınven, reseılik Mırra Andreeva turaqtady. Qazaqstannyń birinshi raketkasy Elena Rybakına 11-satyda, Iýlııa Pýtınseva 33-orynda tur. Ispanııadaǵy týrnırde top jarǵannan keıin Zarına Dıas WTA-daǵy jaǵdaıyn biraz jaqsartyp aldy. Jerlesimiz osy aptada
28 satyǵa joǵarylap, bul kúnderi 246-oryndy ıelenip otyr.
