Foto: parlam.kz
Memleket basshysy 2025 jyldy – «Jumysshy mamandyqtary jyly», ıaǵnı eńbek adamy jyly dep jarııalaýy – mańdaı terin tógip, tirshiliktiń tynysyn qamtamasyz etip otyrǵan qarapaıym jumysshylarǵa degen qurmettiń bıik belgisi ekenin atap ótken T.Serikov kez kelgen mekemedegi eden jýýshy, tehnıkalyq qyzmetker, garderobshy, qaraýyl, vahter, aýla sypyrýshy sekildi jumysshylardyń mártebesi men jaǵdaıy qazirgi tańda ózekti ekenine toqtaldy.
«Búginde bul sanattaǵy qyzmetkerlerdiń eńbekaqysy elimizdegi ortasha jalaqy kórsetkishinen áldeqaıda tómen. Kóp jaǵdaıda olar aýyr fızıkalyq eńbekpen aınalysa tura, áleýmettik jeńildikterden, kásibı qorǵaýdan jáne kótermeleýden tys qalyp jatady. Eger osy qyzmetkerler bir kún jumys jasamasa kóshe lastanyp, mekeme ishi kirlenip, jıhazdar shań bolyp biz kúndelikti kórip júrgen tazalyqtyń sáni keter edi. Biz nege osyǵan mán berip qaramaımyz? Aýla sypyrýshy, tehnıkalyq qyzmetkerlerdiń eńbek aqysy az, jeńildik joq, tipti adamdar arasynda qarapaıym eden jýýshy dep mensinbeı qaraýshylyq basymyraq. Búginde bul sanattaǵy eńbekkerlerdiń jalaqysy tómen», dedi depýtat.
Depýtattyń aıtýynsha olardyń áleýmettik mártebesi naqty aıqyndalmaǵan, saýyqtyrý men tynyǵýǵa múmkindigi shekteýli, kásibı damýǵa jaǵdaıy qarastyrylmaǵan.
«Al endi osy qyzmetkerlerdiń mártebesin qalaı kóteremiz? Ol úshin kez kelgen memlekettik, kvazımemlekettik mekemeler osy sanattaǵy qyzmetkerlerge jylyna bir ret turaqty túrde mekeme esebinen sanatorııge joldama jáne 13 shi jalaqysyn berý kerek. Sonymen qatar eńbek demalysyna shyqqanda 2 aılyq emdik posobııasyn berý qajet. Sebebi olarda onsyz da eńbek aqysy az. Jáne mindetti túrde qaıta daıarlaý jáne kásibı damý kýrstaryna aqysyz qatysýyna jaǵdaı jasaý kerek. Bul- olarǵa mamandyqtaryn ózgertýge múmkindik beredi. Al zeınetke shyqqan ardagerlerge mekemeniń arnaıy qurmetti ataǵy ne marapatyn engizý qajet», dedi Májilis depýtaty.
Tańsáýle Ǵabdymanapulynyń sózinshe kún saıyn tap-taza keńsege, taza jolǵa, jyly qarsy alýǵa úırengenbiz. Biraq sol tazalyq pen tártiptiń artynda únsiz júrgen myńdaǵan eńbek adamy bar ekenin esten shyǵarmaýymyz kerek. Bul – tek materıaldyq emes, adamgershilik pen ádilettiliktiń de máselesi.
«Jumysshy mamandyqtary jyly» bos uranǵa aınalmaı, naqty istermen kórinis tabýy tıis. Oǵan alǵashqy qadam – eń tómengi býynda eńbek etip júrgen osy mamandarǵa qamqorlyqtan bastalýy qajet», dep aıtqan depýtat birqatar usynystaryn aıtty.
«Atalǵan sanattaǵy qyzmetkerlerge eńbekaqyny arttyrý. Olardy «qoǵamdyq mańyzy bar jumysshy» retinde zańnamalyq turǵyda ataý berý. Jyl saıynǵy memlekettik kvota arqyly tegin saýyqtyrý shıpajaılaryna (sanatorıı) joldama berý júıesin engizý – bul olardyń densaýlyǵyn qalpyna keltirip, qoǵamdaǵy qadir-qasıetin arttyratyny anyq. Mamandardy oqytý, qaıta daıarlaý jáne kásibı damý kýrstaryna aqysyz qatysýyna jaǵdaı jasaý. Ardager tehnıkalyq qyzmetkerlerge (zeınetke shyqqan eden jýýshy, aýla sypyrýshy, garderobshy, t.b.) arnalǵan qurmetti ataq nemese tósbelgi engizý múmkindigin qarastyrý», dep usynystarmen túıindedi «Aýyl» partııasy fraksııa depýtattary atynan Tańsáýle Serikov.
