Foto: Ashyq derekkóz
Mınıstrdiń aıtýynsha, elimizde JI salasyn ilgeriletý naqty úsh strategııalyq baǵyt aıasynda júzege asyrylyp jatyr. Olar: ınstıtýsıonaldyq bazany qurý, ınfraqurylymdy qalyptastyrý jáne adamı kapıtaldy damytý.
«JI elimizdiń tehnologııalyq damýynyń basym baǵyty. Biz osy baǵytta naqty strategııalyq kózqaras qalyptastyryp jatyrmyz. Osy oraıda úsh negizgi baǵytty atap ótý kerek. Olar: ınstıtýsıonaldyq bazany qurý, ınfraqurylymdy qalyptastyrý men adamı kapıtaldy damytý. Osynyń ishinde ár baǵyt boıynsha iri bastamalar iske asyrylyp jatyr. Memleket saıasatynyń arqasynda Qazaqstan sıfrlandyrý men JI tehnologııalary salasynda aımaqta kóshbasshy atanyp otyr», dedi mınıstr.
Esterińizge sala keteıik, mınıstrliktiń janynan bir jyl buryn arnaıy JI komıteti qurylyp, ol búginde Qazaqstanda jasandy ıntellekt boıynsha memlekettik saıasatty úılestiretin jaýapty organ retinde jumys istep jatyr.
Mınıstrdiń aıtýynsha, byltyr shilde aıynda 2024–2029 jyldarǵa arnalǵan Jasandy ıntellektti damytý tujyrymdamasy bekitildi. Bul qujatta normatıvtik-quqyqtyq retteý, tehnologııalyq damý men JI ekojúıesin qurý máseleleri qamtylǵan.
Sondaı-aq Memleket basshysynyń tapsyrmasymen JI-dy damytý jónindegi keńes qurylyp, onyń quramyna halyqaralyq sarapshylar engen.
«Jasandy ıntellekt týraly zań jobasy da ázirlenip, qazirgi tańda birinshi oqylymda maquldanǵan. Qujatty 2025 jyldyń sońyna deıin qabyldaý josparlanyp otyr. Jeltoqsan aıynda Ulttyq JI platformasy daıyndalyp, ónerkásiptik paıdalanýǵa berildi. Onyń operatory retinde «Ulttyq aqparattyq tehnologııalar» AQ belgilengen», dedi mınıstr.
Sonymen qatar Jaslan Mádıev jasandy ıntellekt salasynyń ornyqty damýyn qamtamasyz etý úshin Qazaqstan aldaǵy bes jyl ishinde 1 mıllıon maman daıarlaýdy josparlap otyrǵanyn aıtty.
Oqý baǵdarlamalary ártúrli, atap aıtsaq, 500 myń oqýshy, 300 myń stýdent, 100 myń memlekettik qyzmetker, 80 myń korporatıvtik sektor men standarttaý salasynyń ókilderi jáne 30 myń ózge sanattaǵy azamattarǵa beıimdelgen.
«Árbir top úshin arnaıy oqý baǵdarlamasy jasalǵan. Jalpy barlyq sharalar JI jáne ınnovasııalardy damytý komıteti arqyly júzege asyrylady», dedi Jaslan Mádıev.
