Sıfrlyq qoǵamdyq ınfraqurylym – bul sıfrlyq tólemder, sáıkestendirý jáne derekter almasý júıeleriniń qaýipsiz ári ózara árekettese alatyn jıyntyǵy. Sıfrlyq dáýirde bul júıeler ekonomıka men áleýmettik ómirge tolyqqandy qatysýdyń basty alǵyshartyna aınaldy. «DPI» barlyq elde ornyqty ári ınnovasııalyq ekonomıka quryp, turǵyndardyń ál-aýqatyn qamtamasyz etýi úshin qajet.
«50-in-5» bastamasynyń negizgi maqsaty – 2028 jylǵa deıin 50 el kem degende bir «DPI» elementin engizý. Bul tájirıbe almasý jáne ashyq sıfrlyq ónimderdi qoldana otyryp, birlesken sheshimder ázirleý shyǵynyn azaıtyp, transformasııany jedeldete túsedi.
«Elimizdegi sıfrlyq transformasııanyń basty ózegi – adam. Biz úshin tehnologııa – jaı ǵana tehnologııa emes, ol azamattardyń ómirin jaqsartatyn qural. Osy maqsatta ár qadamymyzdy halyq ıgiligi úshin jasaı otyryp, ashyq, túsinikti jáne tıimdi sıfrlyq memleket quryp jatyrmyz. Shyn máninde, sıfrlyq sheshimder qashyqtyqty qysqartady. Osy arqyly adamdar qaıda tursa da, biz olarǵa jaqyn bola alamyz. «50-in-5» bastamasyna qosylý – azamattarǵa arnalǵan sıfrlyq transformasııamyzdy údetip, shyǵyndardy azaıtýǵa múmkindik beretin mańyzdy qadam», dedi Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev.
Qazir elimizde sıfrlyq qoǵamdyq ınfraqurylymnyń negizgi elementteri tabysty engizilip otyr. Máselen, sıfrlyq sáıkestendirý júıesiniń (Digital ID) negizgi bóligi – «eGov Mobile» mobıldi qosymshasy. Bul – resmı elektrondyq úkimettiń sýpermobıldi qosymshasy, ol qaýipsiz avtorızasııa, qashyqtan jeke basyn rastaý jáne memlekettik qyzmetterdiń keń aýqymyna qol jetkizý múmkindigin qamtıdy.
Búginde «eGov Mobile» qosymshasyn 10,9 mln-nan astam el turǵyny paıdalanady. Onyń ishinde aı saıynǵy belsendi aýdıtorııa 5,3 mln adamdy quraıdy, al táýligine orta eseppen 354 myń paıdalanýshy qosymshaǵa kiredi. «Qyzmetter» bóliminde 200 túrli servıs qoljetimdi, al «eGov Mobile» arqyly kórsetilgen memlekettik qyzmetterdiń jalpy sany 82 mln-nan asty. Ásirese adamdar «Sıfrlyq qujattar» bólimin kóp paıdalanady. Onda jeke kýálikten bastap, júrgizýshi kýáligine deıin 38 túrli elektrondyq qujat qoljetimdi. Bul fýnksııa iske qosylǵannan beri qujattardy 25,7 mln-nan astam ret qoldanǵan.
Sonymen qatar memlekettik júıeler arasynda derekter almasý úshin «Smart Data Ukimet» aqparattyq-taldamalyq platformasy jumys isteıdi. Oǵan 124 memlekettik organnyń aqparattyq júıesi biriktirilgen. Bul ıntegrasııa azamattardyń ómirlik jaǵdaılaryna avtomatty túrde jaýap retinde proaktıvti memlekettik qyzmetterdi ázirleýge múmkindik beredi.
Qazirde áleýmettik baǵyttaǵy 45 proaktıvti memlekettik qyzmet ázirlengen. Olar azamattarǵa, ásirese qıyn jaǵdaıǵa tap bolǵan adamdarǵa baǵyttalǵan ataýly kómek kórsetýge arnalǵan. Osyndaı qyzmetter 4,3 mln-nan astam ret kórsetildi. Sondaı-aq «Smart Data Ukimet», Elektrondyq úkimet shlıýzi jáne «Smart Bridge» birigip, ulttyq derekter almasý júıesiniń negizin quraıdy.
Azat ESEN
