Foto: QR Mádenıet jáne aqparat mınıstrligi
Mádenıet jáne aqparat mınıstrliginiń málimetinshe, bul Marııa Mýdrıaktyń Qytaıǵa besinshi gastroldik sapary. Buǵan deıin ol osy týyndyda Sıýzannanyń partııasyn oryndaǵan bolsa, endi alǵash ret kúrdeli ári emosııaǵa toly grafınıa Almavıvanyń beınesin sahnalaıdy. Bul ról áıel bolmysynyń názik sezimderi men ishki kúresin jetkizetin dramalyq keıipker retinde opera týyndysynyń mańyzyn arttyrady.
Marııa Mýdrıak Qazaqstanda dúnıege kelgen, óner jolyn erte bastaǵan talant. 10 jasynan bastap Italııada vokaldan bilim alyp, ataqty La Skala teatrynyń balalar horynda án salǵan. Keıin Mılan qalasyndaǵy Djýzeppe Verdı atyndaǵy konservatorııany úzdik aıaqtap, búginde álemdik sahnalarda óner kórsetip júr. Ol qazirgi tańda álemdegi eń úzdik on sopranonyń biri retinde moıyndalǵan.
«Ánshiniń Qytaıǵa sapary — onyń halyqaralyq mansabyndaǵy taǵy bir mańyzdy qadam. Bul gatroldik saparda qytaılyq kórermen ónerpazdyń qaıtalanbas zor daýysy men akterlik sheberligin tamashalaı alady», delingen habarlamada.
