Baıqaýǵa 11 atalym boıynsha jetekshi respýblıkalyq jáne óńirlik telearnalardan 300-den astam ótinim kelip tústi. Qysqa tizimge 44 jumys endi.
Jeńimpazdarǵa «Tumar» músinshesimen qatar, otandyq televızııa salasyndaǵy eń joǵary jetistikteri úshin 1 mıllıon teńge kóleminde aqshalaı syıaqy berildi.
Baıqaý barysynda Memlekettik keńesshi Erlan Qarın qatysýshylarǵa jyly lebizin bildirip, «Tumar» báıgesiniń mańyzyn aıshyqtady.
«Barshańyzdy kásibı merekelerińizben shyn júrekten quttyqtaımyn! Búkil eldik istiń basy-qasynda ózderińiz júrsizder. Sondyqtan Aqordada ótken marapattaý rásiminde Memleket basshysy Qasym-Jomart Toqaev jýrnalısterdi «eldegi reformalardyń qozǵaýshy kúshi» dep atap ótti. Bul – úlken senim ári zor jaýapkershilik. Sebebi sizderdiń eńbekterińiz qoǵamnyń kókeıindegi máseleni kóterip, bılik pen buqara arasynda altyn kópir bolyp otyr. Meniń de eńbek jolymnyń bir kezeńi televızııamen tyǵyz baılanysty boldy. 2000-jyldardyń basynda «Habar» telearnasynda halyqaralyq shoý-baǵdarlamany júrgizdim. Jylda osy kásibı mereke qarsańynda «Tumar» baıqaýynda bas qosý jaqsy dástúrge aınaldy. Keler jyly osy báıgeniń onjyldyq mejesin ótkeremiz. О́z basym bul baıqaýdyń úzilmeı, turaqty ótip kele jatqanyna erekshe qýanamyn. Sebebi «Tumar» – qazaq televızııasyndaǵy pýblısıstıkanyń ózindik bir tarıhy men dástúrin jalǵastyryp kele jatqan joba. Kez kelgen salada urpaqtar sabaqtastyǵy – asa mańyzdy qundylyq. Kúni keshe Memleket basshysynyń ardager jýrnalısterge arnaıy qurmet kórsetýiniń taǵylymdyq máni de osynda», dedi Erlan Qarın.
Aıta keteıik, «Tumar» ulttyq baıqaýy alǵash ret 2017 jyly Mádenıet jáne aqparat mınıstrliginiń bastamasymen qurylǵan. Baıqaýdyń basty maqsaty – otandyq televızııanyń sapaly damýyna yqpal etý, televızııalyq kontent óndirisinde talantty mamandardy qoldaý.
Sonymen bıylǵy baıqaýdyń jeńimpazdaryna toqtalsaq, «Eń úzdik áleýmettik telejoba» atalymy boıynsha «Jibek joly» telearnasynyń «Taza qala» jobasy top jardy. Budan bólek, «Jyldyń eń úzdik reportajy» atalymynda «Mır» telearnasynyń «V gostıah ý kochevnıkov», «Eń úzdik jýrnalıstik zertteý» atalymynda «Atameken business» telearnasynyń «AES jáne energetıkalyq qaýipsizdik», «Eń úzdik aqparattyq-saraptamalyq baǵdarlama» atalymynda «24KZ» telearnasynyń «President» baǵdarlamasy, sonymen qatar «Jyldyń eń úzdik telehıkaıasy» atalymynda 31 arnanyń «12:00» telehıkaıasy, «Eń úzdik balalar telejobasy» atalymynda «Turkistan TV» telearnasynyń «Túrkistan saqshylary» telejobasy, «Eń úzdik óńirlik arna» atalymynda «Saryarqa» telearnasy, «Eń úzdik derekti fılm» atalymynda «Jibek joly» telearnasynyń «Chelovek s ostrova Kýlaly» derekti fılmi oq boıy ozyq shyqsa, «Eń úzdik telejýrnalıst» atalymynda «Qazaqstan TV» telearnasynyń tilshisi Aqerke Bektas, «Eń úzdik telejúrgizýshi» atalymynda «Habar» telearnasynyń tilshisi Móldir Dospaeva, sondaı-aq «Eń úzdik sporttyq kommentator» atalymynda «Qazsport» telearnasynyń tilshisi Erik Ersin jeńimpaz atandy.
Al «Tumar-2025» ulttyq televızııalyq baıqaýynyń arnaıy júldesi «KTK» telearnasyna, «Eýrazııa birinshi» arnasyna jáne «Habar» agenttigine tabystaldy.
«Tumar» ulttyq televızııalyq báıgesine «Habar» Agenttigi» AQ jáne «Qazaqstan» RTRK jáne «Medıa damytý qory» KQ, Qazteleradıo, Otaý TV, Galam TV, Sport+, «Qazaqtelekom» AQ syndy otandyq biregeı kompanııalar qoldaý kórsetti.
