«Qordaı» kedendik baqylaý aımaǵynda 52 kılodan asa esirtki tárkilendi

TARAZ. 4 tamyz. О́tken shilde aıynda «Qordaı» kedendik baqylaý aımaǵynyń kedenshileri shekara qyzmetkerlerimen birlese otyryp, esirtki alyp ótýdiń úsh faktisiniń jolyn kesken bolatyn. Nátıjesinde 52 kılogramnan asa esirtkilik zat – geroın tárkilendi. Bul týraly egemen.kz tilshisi habarlady. Jambyl oblystyq memlekettik kirister departamenti «Qordaı» kedeni basshysynyń orynbasary Beken Nurahmetov ustalǵandardyń barlyǵy qyrǵyz azamattary ekenin málimdedi. Sondaı-aq jaqynda «Qarasý» keden beketinde túngi saǵat 11-ler shamasynda memlekettik nomeri S5059AH «Volga 3110» markaly avtokólik toqtatylyp, skanerlik tekserýden ótkizý barysynda artqy dóńgelekteriniń ústińgi qaptalynda kúdikti zattyń ornalasqandyǵy baıqaldy. Kúdik týdyrǵan jasyryn jerdi shuǵyl túrde tereńdete tekserip qaraǵan kezde arnaıy skotchpen oralǵan 95 dana brıket shyqty. Dereý taǵaıyndalǵan hımııalyq saraptama nátıjesinde ustalǵan zat jalpy salmaǵy 32 kılogram 509,84 gramm geroın jáne 46,8 gramm gashısh ekeni anyqtalyp, bul fakti boıynsha Qylmystyq kodekstiń 286 baby 2 tarmaǵynyń 5 pýnkti negizinde qylmystyq is qozǵaldy. Qazirgi ýaqytta elimizdiń ulttyq jáne memlekettik qaýipsizdigin qorǵaý maqsatynda asa iri kólemdegi esirtkilik zatty ustap, erekshe qyraǵylyq tanytqan keden qyzmetkerlerin memlekettik marapatqa usyný máselesi qarastyrylýda. Oralhan Dáýit. Derek: egemen.kz. Sýret: gurk.kz.