Tutastaı alǵanda, óńirde sport nysandary kóptep boı kóterip jatyr. 2024 jyly 17 jańa sport nysany salyndy. Búginde 10 zamanaýı sport ǵımarattarynyń qurylysy bastaldy. Bir aıta keterligi, jańa sport mektepteri elimizdiń atyn shyǵarǵan sportshylar týyp-ósken jerlerge salynady. «Tulpar aýnaǵan jerde túk qalady» degendeı, el mereıin ósirgen maıtalman sportshylardyń kindik qany tamǵan topyraqta aldyńǵy tolqynnyń jolyn qýatyn jasóspirimder de az emes. Saltanatty rásimge qatysqan elimizdiń Bas prokýrory Berik Asylov elge qaıtqan qarajat kóptiń ıgiligine jaratylyp jatqandyǵyna basa toqtaldy.
«Búgin biz úzilip túsken monshaqtaı, saıyn Saryarqanyń tósinde oryn tepken aýylda taǵylymdy oqıǵanyń kýási bolyp otyrmyz. 2022 jyldan bastap elimizde shetke shyǵarylǵan aktıvter qaıtarylyp jatyr. Zań qabyldandy, arnaıy organ quryldy. Memleket basshysy Qasym-Jomart Toqaev atap ótkendeı, bul qarajat el ıgiligine jaratylýy kerek. 2024 jyly 707 mıllıard teńge qaıtarylǵan bolsa, 240 mıllıard teńgege 333 áleýmettik jáne kommýnaldyq nysandar salynyp jatyr, – dedi Berik Asylov. – Qomaqty qarjynyń ár tıyny bolashaqqa jumys isteýi qajet».
Oblystyq dene tárbıesi jáne sport basqarmasynyń aqparatyna qaraǵanda, Zerendi aýylyndaǵy sport mektebiniń qurylys jumystary jyldam júrgizilip, qysqa merzimde júzege asyryldy. 2025 jyldyń qańtar aıynda qurylys jumysyn bir jylda aıaqtaý týraly kelisimshartqa qol qoıylǵan. Endi, mine, mektep alǵashqy tárbıelenýshilerin qabyldaýǵa tap-tuınaqtaı daıyn. Sport mektebinde kúres, boks, aýyr atletıka, jalpy dene tárbıesi, sondaı-aq shańǵy sportymen aınalysýǵa mol múmkindik bar. Jattyǵý alańdary zamanaýı jabdyqtarmen qamtamasyz etilgen. Medısına kabıneti jumys isteıdi.
О́ńir turǵyndary eńsesi bıik, ásem, jaıly sport mektebine joǵary baǵa berdi. Bir aıta keterligi, bul – jalǵyz zerendilikterdiń ǵana emes, tutas óńir turǵyndarynyń ıgiligi úshin atqarylǵan sharýa. Munda oblystyń barlyq jas sportshysy jattyǵa alady. Qysqasy, býyrqanǵan bula kúshpen, sportpen aınalysýǵa degen ynta-yqylastyń shymyrlap qaınap, shıryǵatyn ortalyǵy.
Ǵımarat 6 000 sharshy metr jerdi alyp jatyr. Bir mezgilde 90 adamdy qabyldaı alady. О́zge aýdandardan kelip sport mektebinde oqý-jattyǵý jıyndaryn ótkizetin jas sportshylarǵa arnalǵan 48 adamdyq jatyn korpýsy bar.
Sport mektebinde 42 adam jumys isteıdi. Tolyq qýatyna kóshken kezde 73 adam jumyspen qamtylyp, jańa sport kesheni óńirdegi sportty damytýdyń qýatty tetigi bolmaq.
Aqmola oblysy,
Zerendi aýdany
