Foto: pixabay.com
Eń aldymen – Ekibastuz
Qys saıyn qalyń qar men aıazǵa tótep beretin jylý júıeleri úshin tehnıkalyq daıyndyq – basty basymdyq. Sońǵy jyldary jıi synǵa ushyraǵan Ekibastuzdaǵy jelilerdi jóndeý birinshi kezekke qoıylǵan. Bólingen qarajattyń negizgi bóligi – 3 mlrd teńge shamasynda – dál osy qalada júzege asyrylatyn eki jobaǵa baǵyttalady. Atap aıtqanda, ortalyq jylý taratý pýnktinen eldi mekenderge deıingi 1,4 shaqyrymdyq TM-I jáne TM-III magıstraldary jóndelmek.
Jalpy, byltyr Ekibastuzda 9 shaqyrym jylý jelisi jóndelip, JEO-daǵy qazandyqtar jańartyldy. Tazartylǵan sý qubyry tartylyp, apat qaýpin azaıtýǵa baǵyttalǵan jumystar qolǵa alyndy.
Pavlodardaǵy bastamalar
Oblys ortalyǵynda da naqty jobalar iske asyp jatyr. Pavlov – Shevchenko – Kataev kóshelerindegi turǵyn shaǵyn aýdandardy jylýmen qamtý úshin Kamzın kóshesiniń boıynda TM-13 magıstrali salynýda. Bul jobaǵa 802 mln teńge bólindi.
Sondaı-aq, 2024 jyldyń jeltoqsanynda qabyldanǵan «Energetıkalyq jáne kommýnaldyq sektorlardy jańǵyrtý» ulttyq jobasy aıasynda Pavlodar qalasynyń JEO mańyndaǵy 1-NO-52 ýchaskesinde jańa TM-20a magıstralin salý josparlanyp otyr. 9,8 mlrd teńgelik bul nysan qala aýmaǵynyń 30%-yn jylýmen qamtamasyz etýge múmkindik beredi.
Tozǵan jelini toqtatyp úlgerý kerek
Mamandardyń aıtýynsha, sońǵy derekterge sáıkes óńirdegi jylý jelileriniń tozýy 79,7%-ǵa deıin tómendegen. Biraq bul kórsetkish qaýip seıildi degen sóz emes. Aldaǵy maýsymda úzdiksiz jylý berýdi qamtamasyz etý úshin josparlanǵan jóndeý jumystaryn merziminen keshiktirmeı aıaqtaý mańyzdy bolyp otyr.
Jalpy shyǵyn kólemi 5,8 mlrd teńgeni quraıdy. Onyń 3,8 mıllıardy – respýblıkalyq, 2 mıllıardy – oblystyq bıýdjet esebinen. Bul – aımaqtyq ınfraqurylymdy jańartýda ortalyq pen jergilikti bılik arasyndaǵy birlesken árekettiń kórinisi.
