Foto: gov.kz
RHBQ áskerleriniń basty maqsaty – tótenshe jaǵdaıda, sonyń ishinde radıoaktıvti, hımııalyq nemese bıologııalyq lastaný kezinde jaýyngerlik tapsyrmalardyń úzilissiz oryndalýyn qamtamasyz etý, joǵaltýlardyń aldyn alý, sondaı-aq joǵary dáldiktegi qarý túrlerinen qorǵaný. Sonymen qatar, Qarýly Kúshter sheńberinde ekologııalyq qaýipsizdik pen tabıǵatty qorǵaý zańnamasynyń oryndalýyn qadaǵalaý – osy sala mamandarynyń tikeleı mindeti.
Bul qurylymnyń qoǵam aldyndaǵy naqty úlesin pandemııa kezeńi aıqyn kórsetti. COVID-19 indeti taralǵan tusta RHBQ áskerleri qos maqsattaǵy kúsh retinde jergilikti bıliktiń suranysymen qoǵamdyq oryndar men áleýmettik mańyzy bar nysandarda dezınfeksııa jumystaryn atqardy. Qaýipti vırýstan qorǵanýǵa baǵyttalǵan bul qyzmet – myńdaǵan adamnyń amandyǵyna kepil boldy. Sol eńbektiń laıyqty baǵasy retinde kóptegen áskerı qyzmetshi «Halyq alǵysy» medalimen marapattaldy.
RHBQ mamandarynyń mıssııasy munymen shektelmeıdi. 2024 jylǵy kóktemde oryn alǵan joıqyn sý tasqyny kezinde de olardyń eńbegi eleýli boldy. Aqtóbe, Atyraý jáne Batys Qazaqstan oblystarynda 80-nen astam nysanda dezınfeksııa jumystary júrgizilip, óńdelgen jalpy aýmaq kólemi 750 gektardan asty.
Ýaqytpen birge qaýip te kúrdelene tústi. Sondyqtan RHBQ bólimshelerin jańa býyndaǵy, otandyq ári zamanaýı tehnıkalarmen jaraqtandyrý – basym mindetterdiń biri. Qazirdiń ózinde RHB barlaý keshenderi, aerozoldi búrkemeleý mashınalary, sanıtarlyq óńdeý stansııalary, bıologııalyq barlaý tehnıkasy men robottandyrylǵan keshender – barlyǵy da radıasııalyq jáne bıologııalyq qaýiptiń aldyn alýǵa beıimdelgen. Sonymen qatar, bul salada «Solnsepek» tárizdi joǵary qýatty júıeler de qoldanylyp keledi.
Beıbit zamanda áskerı qaýip azaıǵanymen, bıologııalyq jáne hımııalyq qater únemi ózekti. Sondyqtan RHBQ salasynyń ofıserleri men mamandary – elimiz úshin óte mańyzdy, strategııalyq kadrlar. Olardyń kásibı daıyndyǵy Qurlyq áskerleriniń áskerı ınstıtýtynda qamtamasyz etiledi. Bul bilim ordasynda olar teorııamen qatar praktıkalyq daǵdylardy meńgeredi. Al bilimin jetildirý úshin biliktilikti arttyrý kýrstary, jaýyngerlik daıarlyq sabaqtary jáne túrli deńgeıdegi oqý-jattyǵýlar uıymdastyrylady.
RHBQ qyzmeti – tek kásibılikti ǵana emes, erlik pen adaldyqty talap etetin sala. Qaýipti jaǵdaıda sabyr saqtap, salqynqandylyqpen sheshim qabyldaı bilý – bul jaýyngerlerdiń boıyndaǵy eń baǵaly qasıetterdiń biri. Olar radıasııa men ýdan qorǵaıdy, bıologııalyq qaterdiń aldyn alady, ekologııany saqtaıdy. Al bul – memlekettiń bolashaǵyn qorǵaý degen sóz.
Sondyqtan olardyń eńbegi – el aldyndaǵy uly mindet. Halyqtyń amandyǵy men sarbazdyń serti toǵysqan jerde radıasııalyq, hımııalyq jáne bıologııalyq qorǵanys áskerleriniń shyn kelbeti kórinedi. Olar árdaıym qaýiptiń aldyńǵy shebinde. Endeshe, osyndaı batyr mamandar árqashan qurmetke laıyq.
