Jobanyń ǵylymı negizi – belgili bir ósimdikterdiń (gıperakkýmýlıatorlar) topyraqtan aýyr metaldardy sińirý jáne jınaqtaý qabiletine, sondaı-aq topyraqtaǵy paıdaly mıkroaǵzalarmen sımbıozdyq qatynasta bolatyn mıkorızııalardyń áserine negizdelgen. Bul tásil jer bederin tabıǵı jolmen qaıta qalpyna keltirýdi qamtamasyz etip, ekojúıeniń turaqty damýyna jol ashady.
«Gıperakkýmýlıatorlyq ósimdikter men mıkorızııalardy paıdalaný – elimizdiń klımattyq jaǵdaıyna beıimdelgen, tıimdi ári ekologııalyq turǵydan qaýipsiz ádis. Mundaı bıologııalyq tásilder tek taý-ken óndirisiniń qorshaǵan ortaǵa tıgizetin zııandy áserin azaıtyp qana qoımaı, aýyl sharýashylyǵyna jaramdy alqaptardyń kólemin ulǵaıtýǵa da septigin tıgizedi», deıdi jobanyń jetekshisi, PhD doktory, Sátbaev Ýnıversıteti Taý-ken metallýrgııa ınstıtýtynyń professory Jaqypbek Yrysjan.
Búgingi tańda zertteý jobasy naqty tájirıbe júzinde aprobasııadan ótip jatyr. Tańdalǵan synaq alańdarynda alǵashqy oń nátıjeler tirkelip, ósimdikterdiń aýyr metaldardy sińirý deńgeıi men topyraqtyń ekologııalyq jaǵdaıynyń jaqsarýy baıqalady. Bul ózgerister zertteý toby tarapynan ǵana emes, jobanyń iske asyrylyp jatqan paıdaly qazbalar ken oryndarynyń basshylyǵy tarapynan da joǵary baǵalanyp otyr.
Atalǵan zertteý jobasy Qazaqstannyń taý-ken ónerkásibi aımaqtaryndaǵy tabıǵı resýrstardy utymdy paıdalanýǵa jáne tabıǵı ortany qalpyna keltirý isine eleýli úles qosýy tıis. Sonymen qatar bul bastama jas ǵalymdardyń ǵylym men óndiris toǵysynda naqty nátıjege baǵyttalǵan izdenisteriniń aıqyn kórinisi bolyp otyr.
Sátbaev Ýnıversıteti – Qazaqstandaǵy taý-ken, metallýrgııa jáne ınjenerlik saladaǵy jetekshi joǵary oqý orny. Ýnıversıtet qabyrǵasynda ekologııalyq turaqtylyqty qamtamasyz etýge baǵyttalǵan ǵylymı jobalar júıeli túrde júzege asyp keledi.
