Festıvalǵa Batys Qazaqstan oblysynyń aýdandarynan bólek, Mańǵystaý men Atyraý oblystarynan da halyq teatry ujymdary arnaıy keldi. О́ner saıysyna qatysýshy ujymdarǵa tarıhı topyraqta erekshe qurmet kórsetildi. Qonaqtar Syrym Datuly atyndaǵy tarıhı-ólketaný mýzeıin aralap, el men jerdiń tarıhymen jaqyn tanysty. Ásirese Qadyr aqynnyń bala kúngi mekeni, óleńge alǵash eleńdegen shaǵy týraly tyń derektermen tanysyp, ómiri men ónerine qatysty málimetke qanyqty. Aýdan ortalyǵyndaǵy Qadyr eskertkishine taǵzym etip, gúl shoqtaryn qoıdy.
– Búgin Qadyr aǵamyzdyń áni kompozısııaǵa, sózi qoıylymǵa aınalyp, sahna tórinde sóıleıdi. Qazaq bar jerde – Qadyr bar. Qadyr bar jerde – qazaqtyń rýhy bar. Sizderdiń jasap jatqan eńbekterińiz – ult rýhanııatyna qosqan shynaıy úles, – dedi meımandardy qarsy alǵan Syrym aýdany ákiminiń orynbasary Serik Toqmambetov.
О́ner saıysyna barlyǵy 11 ujym – halyq teatrlary qatysty. Olar Jympıty sahnasynda óner kórsetip, halyqqa rýhanı demalys syılady. О́nerin Qazaqstannyń eńbek sińirgen ártisi, «Parasat» ordeniniń ıegeri Serdesh Qajymuratov bastaǵan qazylar alqasy baǵalap otyrdy.
Festıval nátıjesinde, Tasqala aýdanynyń halyq teatry bas júldege ıe boldy. I orynǵa – Syrym aýdany Bulan aýylynyń halyq teatry, II orynǵa – Terekti aýdanynyń «Dat» halyq teatry, III orynǵa – Qaztalov aýdany, Jalpaqtal aýylynyń M.Ǵumarov atyndaǵy halyq teatry laıyq dep tanyldy.
– Halyq teatry ujymdary Qadyr aqynnyń shyǵarmalary boıynsha shaǵyn sıýjetti ózderi qurastyryp, kompozısııa túrinde kórermenge usyndy. Aqyn óleńderi, aqynnyń sózine shyǵarylǵan ánder barynsha paıdalanyldy. 20-25 mınýttyq qoıylymǵa barynsha daıyndalyp, arnaıy dekorasııa quryp, jańa formattyń mánin túsinip kelgen ujymdar da boldy. Qazylar alqasyna barlyq ujymnyń ónerin bir kún ishinde kórip, baǵalap berý ońaı bolmady, – deıdi Serdesh Qajymuratov.
Batys Qazaqstan oblysy
