Sýretti túsirgen – Erlan OMAR, «EQ»
Aýmaǵy 7 myń sharshy metr bolatyn saıabaqta 170 kólikke arnalǵan avtoturaq ta salynǵan. Sondaı-aq osy keńistik janyndaǵy №5 mekteptiń kireberisi keńeıtilip, balalardyń kirip-shyǵýyna qolaıly jaǵdaı jasalypty. Ákimshilik taǵy dál osyndaı birneshe demalys aýmaǵyn ashýdy josparlap otyr.
– Bul jerde shamamen 40 myń adam turady. Aýdan boıynsha 450 turǵyn úı bolsa, sonyń basym bóligi osy ortalyqta ornalasqan. Eski úılermen qatar jańa turǵyn úıler de boı kóterip keledi. Munda ýnıversıtetter men balabaqshalar bar. Sondyqtan bul aýmaqtyń jańarýy – 40 myń turǵynnyń qýanyshy. Baıqońyr aýdany boıynsha bıyl osyndaı 8 qoǵamdyq keńistik ashý josparlanyp otyr. Buǵan qosa, 88 aýla abattandyrylady. Onyń ishinde 18-i jańadan salynatyn aýlalar, al qalǵan 70 aýlaǵa kúrdeli jóndeý jumystary júrgiziledi, – dedi Baıqońyr aýdanynyń ákimi Talǵat Rahmanberdi.
Ulttyq dombyra kúni qarsańynda ótken bul is-sharada respýblıkalyq «Kúı Anasy» qoǵamdyq qorynyń jetekshisi Tólegen Qýanyshev pen «Esil» ýnıversıtetiniń rektory, professor Aıapbergen Taýbaev arnaıy daıyndalǵan dombyralardy elorda jastaryna tabystady.
– Bul – bizdiń qoǵamdyq qorymyzdyń jaqsy dástúri. Árbir taǵylymdy jıynda ulttyq aspapty nasıhattap, jas urpaqqa dombyra syılaımyz. Máselen, búgin osy aýmaqty abattandyrýǵa atsalysqan jumysshynyń balasyna 243-dombyramyzdy tartý ettik. Osydan alty aı buryn bul jer bos jatqan aýmaq edi. Qoǵamdyq jumys júrgizgen kezimizde jergilikti turǵyndar osy mańaıdy abattandyryp, zeınetkerler men kóp balaly ata-analar demalatyn orynǵa aınaldyrý týraly usynys aıtty. Biz bul oıdy qoldap, Astana qalasynyń ákimi Jeńis Qasymbek myrzaǵa hat joldadyq. Ol bastamany qabyl alyp, Baıqońyr aýdany ákimdigine tıisti tapsyrma berdi. Minekeı, eki aıdyń ishinde bul aýmaq kórikti saıabaqqa aınaldy, – deıdi Tólegen Qýanyshev.
