1996 jyldan beri jumys isteıtin kásiporyn 2001 jyly kásiporyn «Selıngormash» seriktestigi atandy. 2022 jyldan Alekseı Erofeenko ıelik etedi. Kompanııaǵa 6 mlrd teńge ınvestısııa quıylǵan. Osy qarajat esebinen jańa sehtar salynyp, zamanaýı qurylǵylar satyp alyndy. Dırektordyń aıtýynsha, kásiporyn ónimi suranysqa ıe. Munda temirjolǵa qajetti qurylǵylarǵa da tapsyrys berilip, vagondar men lokomotıvterdiń de qosalqy bólshekteri óndiriledi.
Osydan birer jyl buryn kásiporyn qyzmeti eki baǵytqa bólingen. Birinshisi – mashına jasaý baǵytynda standartqa saı emes qurylǵylardy daıarlaý bolsa, ekinshisi – jańa qosymsha jabdyqtaý óndirý. Keıingi eki jylda tapsyrys berýshiler sany ósken. Kásiporyn joǵary qysymdy qazandyqtar men radıoaktıvti materıaldardyń konteınerlerin de daıyndaıdy. Jumys ýchaskesinde 230 túrli stanok tur. Ol stanoktarda joǵary bilikti 40 adam eńbek etedi. Aıyna 800 tonnaǵa jýyq metall qurylǵylary eki aýysymda daıyndalady. Eger tapsyrys berýshige shuǵyl qajet bolsa qosymsha kúsh jumyldyrylady.
Kóptegen óndiris oshaǵyndaǵy tárizdi bul jerde de kadr jetispeıdi. Ásirese tokar, frezerovshık tárizdi mamandyq ıeleri qasqaldaqtyń qanyndaı qat. Ortasha eńbekaqy – 480 myń teńge. Shaǵyn qala turǵyndary úshin táp-táýir tabys. Mine, osy arada óndiris salasynyń mamandaryn daıarlaý máselesi ótkir kúıinde ekenin ekpin túsirip aıta ketýge bolady.
Kásiporyndaǵy úsh sehtyń jańǵyrýy jaıynda bóle-jara aıta ketý kerek. Birinshi kásiporyn nemis qurylǵylarymen tolyq jabdyqtalǵan. Dánekerleý jelisi adam kúshin kóp qajet etpeıtin qurylǵylar arqyly jumys isteıdi. Úırenshikti dánekerleýshi bir jumys aýqymyn táýlik boıy istese, robot 22 mınýtta tap-tuınaqtaı etip múltiksiz dánekerlep shyǵady. Metaldy kesý, óńdeý isi de jańa qurylǵylar arqyly atqarylady. Kásiporynǵa negizinen «Altyn almas», «RG Gold», «Nord Mınerals Kazahstan», «AI Injınırıng» kompanııalary tapsyrys beredi. Taǵy bir jańa sehta plastıkalyq terezeler de óndiriledi. Bul buıymdarǵa da suranys kóp.
Osydan eki jarym aı buryn kásiporyn taǵy bir jańa jobany júzege asyrýǵa kirisipti. Altyn óndiretin fabrıkalardyń suranysyna oraı shaǵyn turǵyn úıler daıyndaı bastaǵan. Shaǵyn úıde turmysqa qajetti barlyq jaǵdaı qarastyrylǵan. Ýaqytsha jaı bolǵanymen, kez kelgen maýsymda paıdalanýǵa ábden bolady. Eń basty ereksheligi, bir orynnan ekinshi orynǵa kóshirý ońaı.
Kásiporyn jumysshylardyń áleýmettik-turmystyq jaǵdaıyna da kóńil bóledi. 27 jyl boıy jumys istemegen ashana jóndeýden ótkizilip, el ıgiligine jaratylǵan. Kásiporyn jumysshylary tegin tamaqtanady.
О́ndirilgen buıymdar ashyq úlgidegi keden qoımasynda saqtalady. Zamanaýı jańa jabdyqtarmen tolyq qamtamasyz etilgen kásiporyn aldaǵy ýaqytta tutynýshy tilegine saı standartty emes qural-jabdyqtardy shyǵarýdy molaıta bermek. О́ndiris órge basqan saıyn el ekonomıkasy da nyǵaıyp, tirshilik tynysy keńeıe beredi emes pe?
Aqmola oblysy,
Stepnogorsk qalasy
