Foto: Ute Wessels/dpa/picture alliance
Bavarııa ishki ister mınıstri Ioahım Herrmannyń aıtýynsha, kúdikti 20 jastaǵy Sırııa azamaty. Ol Avstrııada bosqyn mártebesimen turǵan. Onyń qolynda balǵa men balta bolǵan, biraq jolaýshylarǵa tek balǵamen shabýyl jasaǵan. Oqıǵa kezinde poıyzda shamamen 500 adam bolǵan.
Oqıǵa Shtraýbıng qalasyna jaqyn mańda, Shtraskırhen eldimekeniniń tusynda oryn alǵan. Jábirlenýshilerdiń úsheýi de Sırııa azamattary ekeni anyqtalǵan. Mınıstr Herrmannyń aıtýynsha, kúdikti shabýylǵa deıin olarmen sóılesken jáne olardyń da sırııalyq ekenin bilgen bolýy múmkin. Tórtinshi jábirlenýshiniń azamattyǵy áli naqtylanbaǵan.
Kúdiktiniń ózi aýyr jaraqat alyp, polısııaǵa tapsyrylǵannan keıin tikushaqpen Regensbýrg qalasyndaǵy aýrýhanaǵa jetkizilgen.
Bild basylymynyń habarlaýynsha, shabýyldaýshyny poıyz jolaýshylarynyń biri qarýyn tartyp alyp, soqqy jasap toqtatqan.
Bavarııa polısııasy atalǵan oqıǵa boıynsha tergeý júrgizip jatyr. Buǵan deıin ol Bavarııa polısııasynyń derekter bazasynda tirkelmegen.
