Aleksandr – Jarqaıyń aýdanynyń týmasy. Osyndaǵy orta mektepti bitirgen. Dombyraǵa nelikten úıir bolǵanyn qazir ózi de tap basyp aıta almaıdy. Balalar mýzyka mektebine áldebir qudiret jetektep ákelgen. Birden baýyr basyp ketti. Sheshen dombyra kúmbirlep sóılegen saıyn kókiregindegi ádemi sezimdermen astasyp jatqandaı kórinetin. Kúı tarıhy týraly álippe ispetti ajarly áńgimeni osy mektepte estip-bilgen. Myń san án-áýen, qos ishekten tógiletin qudiretti sazdyń astarynda kóne tarıhtyń kómbesi buǵyp jatyr eken-aý. Aleksandrǵa saıyn dala tósinde sary saǵymmen jarysyp quldılaı júıtkıtin tulparlardyń dúbiri, aıdyn kól ústindegi aqqý-qazdyń suńqyldaǵan úni keremet áser beretin. Janynan dombyrasyn tastamaıtyn boldy. Aqseleýli darqan dalanyń saryny estilse, dombyraǵa kóshirip alǵysy kelip turatyn. Jalaýly jasyl dúnıe kúı bolyp turǵandaı seziletin.
Taǵdyr joly san qıly Aleksandr qazir Reseıdiń Krasnodar qalasynda turady. Osy qaladaǵy Memlekettik mádenıet ınnstıtýtyn bitirgen. Joǵary oqý ornynda oqyp júrgende ózge de aspaptardy birtindep meńgerip oınap kórdi. Báribir dombyranyń úni bebeýlep turady eken. О́zge aspap qansha sheshen bolsa da qos ishektiń qudiretine synyq súıem jetpeıtindeı.
– Dombyranyń úninde adam janyn baýraıtyn, tilmen jetkize almaıtyndaı alapat kúsh bar, – deıdi Aleksandr, – meniń janymdy tebirentetin de sol ǵoı. Altaıdan Atyraýǵa deıingi sheksiz qazaq dalasyn, onyń ishinde saǵynysh oty mazdap turatyn Jarqaıyńnyń jalpaq jonyn saǵynǵanda qolyma dombyra alyp kúı tartamyn. Kádimgideı ýatady. Sarytap saǵynysh tunǵan áýen ishinde tebirenip, terbelip júrgen kezimde Jarqaıyńnyń ǵajap sýreti kóz aldyma keledi. Júrektiń basyndaǵy kilkigen muńdy samal jeldiń lebindeı ydyratyp tarqatyp jiberedi. Kóńil kóktemdeı qulpyrady. О́zim jete almasam da aqsha bulttarmen astasyp dombyramnyń úni jete me dep oılaımyn.
Keıipkerimizdiń aıtýyna qaraǵanda, kúı tolqyny men ákesiniń qarashańyraǵy, balalyq shaǵy ótken tanys kósheleri, taı-qulyndaı tebisip ósken qurbylary kóńil tórinen shyqpaıdy eken. Taǵy bir aıtqany, mándi mádenıet pen óreli óner – el ishindegi yrysty yntymaqtyń tinin bekitetin uly kúsh. Sol kúshti adamdardyń kókiregine darytyp, qýat berip turǵan máńgilik mura dep esepteıdi.
Qazaq dalasynda Dombyra kúni atalyp ótetindigin estigen. El tarıhy, ótkeni men bastan keshken nebir uly oqıǵalar kúı tiline kóship, keıingi urpaqtyń súıegine sińip jatyr. Estigen sátte aq túıeniń qarny jarylǵandaı qýanǵan. Dombyranyń qudiretin alty Alashtyń balasy túgili, ózi de moıyndap jan serigine aınaldyryp keledi emes pe.
Aqmola oblysy,
Jarqaıyń aýdany
