«Týmaq, ólmek – taǵdyrdyń shyn qazasy, Ortasy – ómir, joqtyq qoı eki basy» degen eken kórnekti aqyn, aǵartýshy Shákárim Qudaıberdiuly. Kámshattyń Eýrazııa ulttyq ýnıversıtetiniń «qazaq tili men ádebıeti» mamandyǵynyń bakalavrıaty men magıstratýrasyn bitirgennen keıingi 13 jyl maǵynaly ǵumyry ana tilimizdi shetelde oqytyp nasıhattaýǵa, elimizde túrli salaǵa mamandanyp jatqan stýdentterge meńgertýge jumsalsa, 2 jyly aýyr dertpen kúresýge sarp etilipti...
Ultymyzda «qarlyǵashtyń qanatymen sý sepkendeı» degen tamasha beıneli teńeý bar. Qazaqstan táýelsizdik alǵan soń, biraz seriktes elder qazaq tiline qyzyǵýshylyq bildirdi. Sonyń biri – Úndistan, endi biri – Eýrazııa odaǵyna uıytqy Reseı. Kámshat Tilekqyzy oqytýshylar baıqaýynan oza shaýyp, 2011–2012 jyldary Delıdegi Jámııa Mıllııa Islamııa ýnıversıteti Parsy departamenti quramyndaǵy qazaq tili ortalyǵynda oqytýshy boldy. Al 2014–2020 jyldary tabandaı 6 jyl Máskeý memlekettik lıngvıstıkalyq ýnıversıteti (MGLÝ) «Qazaq tili men mádenıeti» ortalyǵynyń dırektory qyzmetin atqardy. Mádenıetti slavıan stýdentteriniń qazaqsha tilin syndyrdy. Qazaq eliniń shynaıy dostary, jankúıerleri etip shyǵardy.
Árıne, ol 2010 jyldan ómiriniń sońyna deıin L.N.Gýmılev atyndaǵy Eýrazııa ulttyq ýnıversıteti praktıkalyq qazaq tili kafedrasynda tirkelip, halyqaralyq oqytýshylyq issaparǵa osy oqý ornynyń atynan bardy. Kámshatty biliktiligi, mádenıeti, ınabattylyǵy úshin fılologııa fakýltetiniń úlken-kishisi birdeı qadirleıtin. Ol árqashan izdeniste júretin. Máskeýdegi qyzmetinde Ilııas Esenberlınniń «Kóshpendiler» trılogııasy boıynsha qazaq tilinen praktıkalyq sabaqtar ótkizgenin jaqsy bilemiz. Úndistanda uıymdastyrǵan «Babyrnama»: qazaq mádenıetine qatysty uǵym-túsinikter» atty ǵylymı semınary sheteldik áriptesterdiń kóńilinen shyǵypty.
О́mir ár adamǵa amanttap beriledi. Kámshat 39 jylǵy ómirin ıgi is pen bilim shamshyraǵyna arnady. Seıilhandaı polısııa sardarymen jan jarastyryp, Shámil jáne Ibrahım esimdi shekesi torsyqtaı qos perzent súıdi. Shámil – azattyq rýhy, Ibrahım – dana Abaıdyń túpnusqa esimi... Buǵan da «shúkir!» deıik.
Halqymyz «Ornynda bar ońalar» deıdi. Asyl anasynyń áldıin estip quldyrańdaǵan, búgin qamyqsa da, erteń namyspen jetiletin osy baldyrǵandar Kámshat Tilekqyzynyń jasamaǵan jasyn jasasyn, ańsaǵan armanyn júzege asyrsyn dep tileımiz.
Sabyr ShÁRIP,
PhD
