Ortalyqta táýlik boıy jetimder, ata-anasynyń qamqorlyǵynsyz qalǵan, qaraýsyz jáne úı-kúısiz júrgen jáne devıantty minez-qulqy bar kámeletke tolmaǵan balalar turady. Olar arnaıy bilim berý uıymdaryna jiberiledi.
Qazirgi ýaqytta mekemede 76 bala bar. Olardyń ishinde 31 bala resmı mártebege ıe. Sonyń ishinde biri – jetim, al 30 balanyń ata-anasy ata-ana quqyǵynan aıyrylǵan nemese bostandyǵynan aıyrylǵan oryndarda otyr.
Ortalyq dırektory Indıra Nurmuhambetovanyń aıtýynsha, mekemeniń basty mindeti – balalarǵa qaýipsiz turmystyq jaǵdaı jasaý ǵana emes, sonymen qatar moraldyq jáne psıhologııalyq qoldaý kórsetý. Árbir balamen tárbıeshiler men mamandar jeke túrde jumys isteıdi. Olar ómirlik qıyndyqtardy jeńýge jáne jeke áleýetin ashýǵa kómektesedi.
Kezdesýde balalardyń ortalyqqa qaıtalaı túsýiniń aldyn alý máselesine de erekshe kóńil bólindi.
Osy jyldyń basynan beri ortalyqqa 689 kámeletke tolmaǵan bala tústi, olardyń 27-si – qaıtalap túskender. Negizinen olar qaraýsyz jáne úı-kúısiz júrgen balalar.
Ortalyqtyń jumysymen tanysqannan keıin Magerram Magerramov ujymnyń joǵary kásibıligin atap ótti.
– Ortalyq qyzmetkerleriniń jumysyn baqylaý óte jaǵymdy áser qaldyrdy. Bul jumystyń joǵary kásibı deńgeımen qatar, shynaıy jan jylýyn talap etetinin túsine otyryp, munda qıyn ómirlik jaǵdaıǵa tap bolǵan árbir balanyń taǵdyry úshin jasalyp jatqan istiń aýqymy men mańyzyn tereń sezinesiń, – dep atap ótti Májilis depýtaty.
Sońynda depýtattar árbir balanyń jarqyn bolashaǵyn qalyptastyrý isinde memleket, qoǵam jáne mesenattardyń odan ári belsendi qatysýynyń mańyzdylyǵyn erekshe atap ótti.
