Jarystyń saltanatty ashylýynda qurmetti qonaqtar qatarynda Almaty oblysynyń ákimi Marat Sultanǵazıev, «Oceanman» franshızasynyń ıesi Fermın Egıdo, sondaı-aq bas uıymdastyrýshy, «Oceanman Kazakhstan» franshızasynyń ıesi Eraly Oralov boldy.
«Qurmetti sportsúıer qaýym! Qurmetti qatysýshylar! Bul tanymal halyqaralyq baıqaý oblysymyzda osymen tórtinshi ret ótýde. «Oceanman Kazakhstan» jarysy alǵash ret 2022 jyly bastaldy. Atalǵan doda barlyq jas sanatyndaǵy halyq arasynda buqaralyq sportty nasıhattaý men damytýda mańyzdy ról atqaratynyn anyq kórsetti. Bul biz úshin úlken sporttyq jáne mádenı oqıǵa. «Oceanman» baıqaýy jyl saıyn álemniń eń ádemi tabıǵı oryndarynda ótedi. Olardyń qataryna Qapshaǵaı sý qoımasy da kiredi. Dál osyndaı aýqymdy sharalar bolashaqta joǵary sanatty sportshylardy daıyndap, tárbıeleýge septigin tıgizedi, sonymen qatar óńirimizde de, Qazaqstanda da týrızm men sportty damytýǵa qosymsha serpin beredi dep oılaımyn. Álemniń túkpir-túkpirinen kelgen qatysýshylar «Oceanman Qazaqstan» jarysynan erekshe áser alyp qaıtatynyna senimdimin. Barlyq qatysýshylarǵa sáttilik pen jeńis tileımin!», - dedi oblys ákimi Marat Sultanǵazıev.
Júzý jarysy bes qashyqtyqta ótedi. Atap aıtsaq, OCEANMAN 10 km – 300 qatysýshy, HALF OCEANMAN 5 km – 400 qatysýshy, SPRINT 2 km – 800 qatysýshy, OCEANKIDS 500 metr – 500 qatysýshy jáne OCEANTEAM estafetasy 3h500 metrlik jarysta 90 qatysýshy baq synaıdy.
«Jarysqa kásipqoılar da, áýesqoılar da qatysady. Jańadan bastaýshylar úshin - qysqa, al tájirıbeli sportshylar úshin uzaǵyraq qashyqtyq qarastyrylǵan. Daıyndyq joǵary deńgeıde uıymdastyrylǵan. Jalpy qazaqstandyqtar - qonaqjaı halyq. Osyndaı aýqymdy jarysty ótkizýge qoldaý kórsetkeni úshin Almaty oblysy ákimdigine, bas demeýshilerge alǵys aıtamyn. Jeńimpazdar men júldegerler bıyl jeltoqsan aıynda Dýbaıda ótetin álem chempıonatyna qatysady», - dedi «Oceanmen» franshızasynyń ıesi Fermın Egıdo.
Qapshaǵaı sý qoımasyndaǵy sýdyń temperatýrasy júzýshiler úshin óte qolaıly boldy. Qatysýshylardy motorly qaıyqtarda, reaktıvti shańǵylarda jáne baıdarkalarda arnaıy qutqarý qyzmetteri qadaǵalap júrdi.
«Bıylǵy jyldyń mańyzdy ereksheligi - júzýden INSPIRATION sanatyndaǵy 15 balanyń qatysýy. Buǵan deıingi jarysta da osy sanatta júzýshiler bolǵan, biraq bul joly erekshe qajettilikteri bar balalardyń árqaısysynyń qamqorshysy bar. Aıta ketý kerek, INSPIRATION sanatyndaǵy qatysýshylardyń qasynda tájirıbeli sportshylar birge júredi. Mundaǵy qaýipsizdikti kásibı qutqarýshylar qadaǵalaıdy. Bizde Tótenshe jaǵdaılar mınıstrliginiń 22 júzý kemesi men 4 úlken qaıyǵy bar. Volonterlar ár burylysta qatysýshylarǵa sýsyndar usynyp, olardyń ári qaraı júzýine jaǵdaı jasaıdy», - dedi jarystyń bas uıymdastyrýshysy, «Oceanman Kazakhstan» franshızasynyń ıesi Eraly Oralov.
10 shaqyrymdyq júzýden baq synaýǵa kelgen Garvard ýnıversıtetiniń oqytýshysy, úndistandyq Aısha Mansýhanı kúsh pen rýhty synaýǵa biregeı múmkindik bergeni úshin uıymdastyrýshylarǵa alǵys bildirdi.
«Men Qazaqstanǵa alǵash ret kelip otyrmyn. Bul eldiń tabıǵaty men halqynyń qonaqjaılylyǵy tánti etti. О́tken jyly Italııada ótken júzý jarysyna qatystym. Bıyl múmkindiginshe kóp elderge barǵym keledi. «Oceanman» jarysy básekege toly. Sondyqtan bul dodada myqtylar ǵana jeńiske jetedi»,- dedi Aısha Mansýkhanı
Jarystyń birinshi kúni qatysýshylar 10 jáne 5 shaqyrymǵa júzýden jarysty. Al ekinshi kúni SPRINT, OCEANKIDS jáne OCEANTEAM qashyqtyqtary boıynsha baq synaıtyn bolady.
Almaty oblysy.
