- Astana turǵyndarynyń sany jyl saıyn shamamen 100 myń adamǵa kóbeıip turady. Al, "Ákimshilik-aýmaqtyq qurylys týraly" zań boıynsha aýdandyq mańyzy bar qalalarǵa qoıylatyn halyq sanynyń tómengi shegi 10 myń adamdy quraıdy. Basqasha aıtqanda, Astanaǵa jyl saıyn osyndaı onǵa jýyq qala qosylady. Mysalǵa, 2025 jylǵy 1 mamyrdaǵy jaǵdaı boıynsha astanalyqtardyń sany 1 mln 558,5 myńnan asty. Sonyń ishinde bıylǵy nebary 4 aıda elordaǵa 23 346 adam túpkilikti kóship kelgen, – dedi Baqytbek Smaǵul.
Ajarly Astana árkimdi ózine magnıtteı tartady. Mundaı qarqynmen, B.Smaǵuldyń baǵalaýynsha, elordalyqtardyń sany tek bıyl tutas Saraıshyq aýdanynyń halqyna teń kólemde ósip shyǵa keledi. Olaı bolsa, alda Astanada taǵy bir jańa aýdan paıda bolýy múmkin.
Onyń dereginshe, qazirgi kezde Astana qalasynyń jalpy aýdany 797,3 myń sharshy shaqyrym. Bul Sıngapýr, Bahreın, Andorra, Malta, Maldıv sııaqty elder tutas sııatyn alyp aýmaq. Nemese bul terrıtorııaǵa 1 626-dan astam Vatıkan syıyp ketedi eken.
- Munsha úlken aýmaqty shyp-shyrǵasyn shyǵarmaı basqaryp, zamanǵa saı damytý úshin Abaı babamyz ósıet etkendeı, ystyq qaırat, nurly aqyl, jyly júrek qajet, nemese Ǵabıt Músirepov aıtqandaı, "tis te kerek, is te kerek, bilek te kerek, júrek te kerek". Bir qyzyqty jaıtty bildim, eger jańa Astana jarııalanǵan aldyńǵy 26 jyl ishinde onyń 4 aýdany ǵana qurylsa, al, Prezıdentimizdiń Jarlyǵymen elordanyń tizginin 2022 jyly J.Qasymbek ustaǵaly, bas qalanyń aýdandarynyń sany 6-ǵa deıin ósipti, – dedi qoǵam qaıratkeri.
