«TUF» realıtı-shoýy osymen 33-márte uıymdastyrylyp otyr. Jarysta jeńimpaz atanǵan faıter birden UFC-ge joldama alady. Kezinde Kamara Ýsman, Neıt Dıaz, Tonı Fergıýson, taǵy basqa juldyzdardyń dál osy joba arqyly tanylǵanyn jankúıerler jaqsy biledi. Qazir Álibı Ydyrysqa ózin túbegeıli moıyndatýǵa tamasha múmkindik týyp otyr. Ol kúsh synasyp júrgen 56,7 kg salmaqta segiz sportshy óz ónerin ortaǵa salady. Álibı alǵashqy synaqtan súrinbeı ótti. Endi oǵan jartylaı fınal men fınalda jeńiske jetý qajet. Eger osy jospar oıdaǵydaı júzege assa, jeńilistiń kermek dámin tatyp kórmegen qazaqtyń qaısar ulyn biz UFC-den kóremiz. Bul rette dál osy salmaqta álemniń eń beldi promoýsheninde Asý Almabaev pen Azat Maqsumnyń da baryn esterińizge sala keteıik.
30 jastaǵy Aqtóbeniń týmasy óziniń barlyq jekpe-jegin «Naıza» promoýsheninde ótkizip, sol uıymnyń chempıony atandy. 2019–2025 jyldar aralyǵynda Medet Jumamurat (sabmınshn), Islam Aıbatov (sabmınshn), Temýr Japarov (upaı sanymen), Argen Málikov (nokaýt), Aslan О́teǵalıev (upaı sanymen), Djohar Eskıev (nokaýt), Flavıo Santos (nokaýt), Alısson Sılva (upaı sanymen), Erısson Ferreıra de Sılva (nokaýt), Edılson Santosqa (nokaýt) san soqtyrdy.
Álibı Aqtóbe qalasynda «Erkin kúsh» klýbynda bilikti bapker Aıbek Shoqbytovtyń qol astynda jattyǵady. Komandalyq áriptesteri qatarynda Jalǵas Jumaǵulov, Dáýren Ermekov, Goıtı Dazaev, Nurbek Qabdyrahmanov, Dastan Amankeldi, Baǵdat Jubanysh, taǵy basqa tanymal sportshylar bar. Solardyń arasynan Jalǵas daralanyp, kezinde UFC-de kúsh synasty. О́zge jigitterdiń de qarqyny jaman emes. Olar da túrli promoýshende óreli ónerlerimen jankúıerlerdi qýantyp júr.
