Foto: Joǵarǵy Sot
Tergeý organy Á. Muhamedıarovty QR QK-niń 292-baby 3-bóligi órt qaýipsizdigi talaptaryn saqtaý úshin jaýapty adamnyń olardy buzýy, abaısyzda eki nemese odan da kóp adamnyń ólimine ákep soqqanyna baılanysty aıyptady.
A. Pekelnık QR QK-niń 292-baby 3-bóligi boıynsha sotqa berildi, alaıda memlekettik aıyptaýshy sotta bapty QR QK-niń 306-baby 3-bóligine, ıaǵnı tutynýshylardyń ómiri nemese densaýlyǵy qaýipsizdigine saı kelmeıtin jumystardy oryndaý ne qyzmetter kórsetý, abaısyzda adamnyń ólimine ákep soqqan faktige aýystyrdy.
Sot barysynda A. Pekelnık jeke kásipker bola turyp, ózine tıesili menshiktegi órt qaýipsizdigin qadaǵalamaǵany belgili boldy.
Al órt dabyly júıesin elektr jabdyqtarymen jumys isteýge ruqsaty men biliktiligi joq adamdar ornatqan. Jumystar jobamen sáıkes kelmegen, ornatýdan keıin dabyl júıesiniń syzbasy rásimdelmegen. Bul A. Pekelnıktiń óz mindetterine formaldy jáne jaýapsyz qaraǵanyn kórsetken.
Sarapshynyń málimeti boıynsha, dybys sıgnalynyń deńgeıi keminde 75 dB bolýy tıis, alaıda is júzinde ol 28,8–72,7 dB aralyǵynda bolǵan, al turǵyn jáne jertóle bólmelerinde – 28,8–58,2 dB deńgeıinde ǵana, bul órt kezinde jedel eskertýge múmkindik bermegen.
Aıyptalýshy Á. Muhamedıarov órt qaýipsizdigi talaptary men zańnamada kórsetilgen tyıymdarǵa qaramastan, jertóle qabatynda 48 orynǵa arnalǵan 6 jatyn bólmeden turatyn oryn jaılastyrǵan. Sonymen qatar ol evakýasııaǵa arnalǵan jalǵyz shyǵý esigin qulyptap qoıǵan. Bul adamdardyń shuǵyl shyǵyp ketýine kedergi keltirgen. Dálizge qoıylǵan tósek oryndary da adamdardyń ǵımaratty tez bosatýynda qıyndyq týǵyzǵan.
Sot olardy joǵaryda atalǵan aıyptaýlar negizinde kináli dep tanyp, Á. Muhamedıarovdy 5 jylǵa, A. Pekelnıkti 4 jylǵa bas bostandyǵynan aıyrý úkimin shyǵardy.
Úkim zańdy kúshine engen joq.
