Halal sertıfıkaty berildi

Taıaýda Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyuly halal ónimderin óndiretin «Halal sultan» JShS, «Aq nıet» JShS kásiporyndarynyń basshylaryna Dinı basqarmanyń sertıfıkatyn berdi. Kezdesý barysynda Bas múftı QMDB-nyń «Halal ónimderin standarttaý» bóliminiń ruqsatyn alǵan ónimniń taýarlyq tańbasy qazaqsha «Adal» degen sózben erekshelenetinin jetkizip, «Adal as tutynǵan halyqtyń urpaǵy deni saý, bilimdi, tekti bolady. Adal as eldik másele. Sondyqtan, halal óndirisin durys jolǵa qoıý ózekti máselelerdiń biri. Osy máselelerdi bir jolǵa qoıý úshin tıisti mekemelermen jumys jasaýdamyz», dedi. Sonymen qatar, Dinı bas­qarmanyń sertıfıkatyn alýǵa nıet bildirgen kásiporyndarmen jumys jalǵasýda, konsýltasııalar ótkizilýde. Aldaǵy ýaqytta sharıǵat talaptary tolyq oryndalǵan jáne oryndalýy qamtamasyz etilgen óndiris oryndaryna halal sertıfıkaty beriletin bolady. Halal ónimderdi standarttaý bóliminiń meńgerýshisi Beıbit Myr­zageldıev halal sertıfıkaty be­rilgen kásiporynnyń jumysyn qa­daǵalaıtyn ár óńirden kelgen ókildermen kezdesip, elimizdegi halal ónimge qatysty ózekti máseleler jaıly pikir almasty, dep habarlady QMDB-nyń baspasóz qyzmeti.