828 adam MNU túlegi atandy, onyń 698-i bakalavr, 130-y magıstr dárejesine ıe boldy. Jas mamandardyń kóbisi Quqyq joǵary mektebin (271 bakalavr jáne 69 magıstr) bitirdi. Al 25 túlekke «Jýrnalıstıka: analıtıka jáne tergeý» mamandyǵy boıynsha dıplom tabystaldy. MNU baspasóz qyzmetiniń málimetinshe bul mamandyq 4 jyl buryn Aqparat jáne mádenıet mınıstrliginiń qoldaýymen ashylǵan. Odan soń oqý ordasy 2023 jyly Prezıdent Teleradıokeshenimen birlesip Halyqaralyq jýrnalıstıka mektebin iske qosqan.
Túlekterdi Ǵylym jáne joǵary bilim mınıstri Saıasat Nurbek quttyqtady.
«30 jyl ishinde Maqsut Narikbayev University zań biliminiń altyn dińgegine aınaldy. Biz muny moıyndaımyz. Birinshi kezekte túlekterdiń ata-analaryn quttyqtaımyn jáne sizderge alańdaıtyn eshteńe joq ekenin aıtqym keledi. Sebebi MNU búginde túlekterdi jumysqa ornalastyrý kórsetkishi boıynsha aldyńǵy qatarda tur. Olar eń myqty kompanııalarda jumys isteıdi, sondaı-aq biz olardy memlekettik qyzmette kórýge qýanyshtymyz», dedi mınıstr.
Dıplom tabystaý rásimi Femıda gúlzarynda ótti.
«Maqsut Narikbayev University bergen tálimgerlik pen múmkindikterdiń arqasynda men úlken kompanııalarda taǵylymdamadan ótip, túrli keıs-chempıonattarǵa qatystym. Búginde men PwC-te - aýdıtorlyq qyzmet kórsetetin Big4 kompanııalarynyń birinde jumys istep jatyrmyn. Ýnıversıtet bizge moıymaýdy jáne ózimizge senýdi úıretti», dedi MNU túlegi Baqyt Saqyshova.
