Foto: Aýyl sharýashylyǵy mınıstrligi
Búginde Qazaqstannyń veterınarııalyq qyzmetinde 15 myńǵa jýyq bilikti maman eńbek etip júr. Olardyń árqaısysy agroónerkásiptik keshendi damytýǵa, eksporttyq áleýetti arttyrýǵa jáne aýyldyq aýmaqtardyń ál-aýqatyn jaqsartýǵa eleýli úles qosyp keledi.
Aýyl sharýashylyǵy mınıstri Aıdarbek Saparov veterınarııalyq qyzmettiń el úshin strategııalyq mańyzyn atap ótti.
«Veterınarııa salasynda jumys isteý – joǵary biliktilikti, jaýapkershilikti jáne iske degen adaldyqty talap etedi. Sizderdiń eńbekterińizdiń arqasynda janýarlardyń densaýlyǵy, azyq-túlik qaýipsizdigi jáne aýyl sharýashylyǵy óndirisiniń turaqtylyǵy qamtamasyz etiledi. Beker aıtylmaǵan: dáriger adamdy emdese, veterınar – adamzatty emdeıdi. Bul sózder mamandyqtaryńyzdyń mańyzyn aıqyn kórsetedi.
Memleket basshysy veterınarııalyq qaýipsizdik júıesin jańǵyrtýǵa erekshe kóńil bólip otyr. Úkimet ınfraqurylymdy nyǵaıtý, eń zamanaýı jabdyqtar satyp alý, sıfrlyq monıtorıng quraldaryn engizý baǵytynda jumys júrgizip jatyr. Qysqa merzim ishinde mamandardyń eńbekaqysy eki ret kóterildi. Barlyq qabyldanǵan sharalar júıeniń tıimdiligin arttyrýǵa baǵyttalǵan», dedi mınıstr.
Is-shara aıasynda memlekettik jáne salalyq marapattar tabystaldy: 5 adam aýyl sharýashylyǵy mınıstriniń «Qurmet» gramotasymen marapattalsa, 14 mamanǵa «Aýyl sharýashylyǵy salasynyń úzdigi» tósbelgisi, 3 sala ardagerine «Eńbek ardageri» medali tabys etildi. Jalpy, óńirlerde 160 qyzmetker men ardagerdiń eńbegi elendi.
О́ńirlik veterınarııalyq bólimshelerge qyzmettik avtokólikterdiń kiltteri tabys etildi – barlyǵy 93 birlik arnaıy tehnıka berildi.
Is-shara qatysýshylary respýblıkalyq veterınarııalyq zerthananyń jumysymen de tanysty.
