Qazaqstanda aýyr atletıkadan halyqaralyq jarystar uzaq ýaqyttan beri uıymdastyrylmaǵan edi. Sońǵy ret aýqymdy týrnır 2014 jyly Almatyda ótken bolatyn. Ol kezde 76 elden kelgen 700-ge jýyq atlet álem chempıonatynda baq synady. Sol joly bizdiń qurama komandalyq esepte tórtinshi oryndy ıelenip, úsh altyn, bir kúmis jáne bir qola medalǵa qol jetkizgen edi.
Arada on jyl ótken soń, sheteldik atletter qazaqstandyq tuǵyrǵa qaıta oraldy. Astanada ótken Azııa chempıonatynda 27 qurama medaldar úshin talasty. Ziltemirshilerdiń jalpy sany 450-den asty. Bul qurlyqtyq birinshiliktiń aýqymyn arttyryp, jarystyń deńgeıin joǵary ári tartysty etti. Osy oraıda, jarys qojaıyny retinde Qazaqstan quramasy da eń kóp sportshymen óner kórsetti.
- Azııa chempıonatyna daıyndyq joǵary deńgeıde ótti. Naýryz aıynan beri alty oqý-jattyǵý jıynyn ótkizdik. Sońǵysy Almaty oblysynda uıymdastyryldy. Biz tek nátıjege jumys istedik. Sportshylarymyz bar kúshin salyp daıyndaldy. Aýyr atletterdiń 100 paıyz daıyn ekenine senimdi boldyq, – dedi bas bapker Albert Hakımýlın.
Nátıjesinde bapkerlik quramnyń boljamy tolyqtaı aqtaldy. Bizdiń qurama medaldyq esepte jeńimpaz atandy. Jeti ret sportshylarymyz altynnan alqa taǵyp, tórt ret kúmiske, alty ret qolaǵa qol jetkizdi. Azııa chempıonatynyń jeńimpazdary: Ksenııa Prozorova (58 kelige deıin), Álıhan Áskerbaı (71 kelige deıin), Nurjan Jumabaı (79 kelige deıin), Edige Emberdi (79 kelige deıin), Kıra Danılova (69 kelige deıin), Erasyl Sáýlebekov (88 kelige deıin), Denıs Polýboıarınov (94 kelige deıin).
Aıta ketý kerek, jalpy nátıjege kishi medaldar da esepke alyndy. Bul kishi medaldar julqa kóterý men serpe kóterýden úzdik atanǵan sportshylarǵa tabystaldy. Osy esep boıynsha da Qazaqstan basqa memleketterden basym tústi.
- Jalpy alǵanda quramanyń ónerin "óte jaqsy" dep baǵalaýǵa bolady. Jalpy medaldyq esepte jasóspirim uldar men qyzdar birinshi oryndy ıelendi, jastar da keremet óner kórsetti. Basty maqsatymyz komandalyq esepte jeńý bolatyn. Demek, josparymyz tolyq oryndaldy, – dep atap ótti Hakımýlın.
Maman komandanyń aıtarlyqtaı jańarǵanyn, biraq basty úmit artqan sportshylardyń óz mindetin tolyq atqarǵanyn da aıtty.
- Bizdiń áleýetimiz óte joǵary. Kóptegen sportshy úshin bul alǵashqy halyqaralyq jarys boldy. Kóptegen jas atlet ózderin jaqsy qyrynan kórsetti. Ksenııa Prozorova, Kıra Danılova, Álıhan Áskerbaı, Edige Emberdi, Erasyl Sáýlebekov, Denıs Polýboıarınov, Aqjol Qurmanbek… Olar bizdi tańǵaldyrdy dep aıta almaımyn – biz olardan dál osyndaı nátıjeni kúttik, olar senimdi aqtap, tamasha nátıje kórsetti.
Sondaı-aq birqatar sportshymyz tek Azııa chempıonatynda el namysyn sátti qorǵap qana qoımaı, qurlyq pen álem rekordtaryn jańartqanyn da aıryqsha atap ótken jón. Ásirese, Álıhan Áskerbaı erekshe kózge tústi. Ol úsh álemdik jáne úsh Azııa rekordyn jańartty.
Qosalqy quram bul synnan súrinbeı ótkeni - qýantarlyq jaǵdaı. Eń bastysy - eresekter arasynda da osy deńgeıde óner kórsetý. Qazir qurama demalysta. Alda Bahreınde ótetin jasóspirimder arasyndaǵy Azııa oıyndary bar. Bapkerlik shtab tamyz-qyrkúıekte qaıta qarqyndy daıyndyqty bastaýdy josparlap otyr. Demek, taǵy da tańǵalarlyq nátıje kórsetý qajet.
