Úkimet • 11 Shilde, 2025

Aqtaýdyń jylý jelileri jańartylady

40 ret

kórsetildi

1 mın

oqý úshin

Memleket basshysynyń jylytý maýsymynda halyqty jylýmen úzdiksiz qamtamasyz etý jónindegi tapsyrmalaryn iske asyrý sheńberinde Mańǵystaý oblysy Aqtaý qalasyndaǵy 9,2 shaqyrym magıstraldyq jylý jelilerin rekonstrýksııalaý jumystaryn aıaqtaýǵa Úkimet rezervinen shamamen 3,6 mlrd teńge bólindi. Premer-mınıstr Oljas Bektenov tıisti qaýlyǵa qol qoıdy, dep habarlaıdy Egemen.kz Úkimettiń baspasóz qyzmetine silteme jasap.

Shyńǵys MUQAEV

Foto: primeminister.kz

Jalpy quny 13,8 mlrd teńge bolatyn bul jobany iske asyrý 2024 jyly bastalǵan.

Búginde joba aıasynda eki qubyrly júıemen 5,5 shaqyrym jylý jelisi tartyldy. Eski bolat qubyrlar bólshektelip, olardyń ornyna 530 mm-den 1020 mm-ge deıingi dıametrli kóbikti polıýretan oqshaýlaǵyshpen jabdyqtalǵan zamanaýı qubyrlar ornatylyp jatyr. Sondaı-aq 2024-2025 jylǵy jylytý maýsymynda anyqtalǵan 375 aqaý tolyǵymen jóndeldi.

Aqtaý qalasynyń jylý jelileriniń jalpy uzyndyǵy 562 shaqyrym. Tozý deńgeıi – 79%. Atalǵan joba iske asyrylǵannan keıin jelilerdiń tozý deńgeıi 75%-ǵa deıin qysqarady. Bul turǵyndardy jylytý maýsymynda úzdiksiz jylýmen qamtamasyz etýge, ystyq sý jetkizý ótkizý qabiletin arttyrýǵa jáne paıdalaný shyǵyndaryn azaıtýǵa múmkindik beredi.

Aldaǵy ýaqytta «Energetıka jáne kommýnaldyq sektordy jańǵyrtý» ulttyq jobasyn júzege asyrý aıasynda 2025-2029 jyldarǵa arnalǵan qarjylandyrý kólemin aıqyndaı otyryp, 2029 jylǵa deıin 175 shaqyrym jylý jelileri men jylýmen jabdyqtaý kózderin rekonstrýksııalaý jáne salý josparlanyp otyr. Joba jelilerdiń tozýyn azaıtýǵa jáne ınvestısııa tartý arqyly kommýnaldyq qyzmetterdiń sapasyn arttyrýǵa baǵyttalǵan.