Satylymǵa qoıylǵan baǵaly zattardyń ishinde «Qazaqtyń ulttyq oıyndary men dástúrleri» serııasynan shyǵarylǵan kúmis monetalar bar. Atap aıtqanda, «Bata», «Betashar» jáne tórt dana «Súıindir» monetalary usynylǵan. Sonymen qatar eki dana «Shyńǵys han» jáne bir dana «Chinggis Khan áskerleri» atty 500 teńgelik monetalar da bar.
Barlyq zattar jańa kúıinde saqtalǵan, kóbi túpnusqa qorabymen nemese arnaıy fýtlıarda usynylyp otyr.
Aýksıon memleket menshigine qaıtarylǵan aktıvterdi iske asyrý sheńberinde ótkizilip jatyr. Resmı qujattarda bul buıymdardyń naqty ıesi kórsetilmegenimen, olardyń Qaırat Satybaldymen baılanysy bolýy múmkin degen boljam bar.
Eske salsaq, 2024 jyly Qazaqstannyń Bas prokýratýrasy Qaırat Satybaldy men onyń aınalasynan júzdegen mıllıon teńge turatyn 174 sán-saltanat buıymyn – eksklıýzıvti áshekeılerdi, brendtik saǵattar men sırek kezdesetin kolleksııalyq monetalardy tárkilegenin habarlaǵan edi.
