Foto: almaty_police_department
Almaty qalalyq PD Ákimshilik polısııa Basqarmasynyń prosessıng ortalyǵynyń bastyǵy Aıdyn Merkimbaevtyń túsindirýinshe, QR-nyń «Ishki ister organdary týraly» Zańynyń 6-babyna sáıkes, júrgizýshi kýálikterin, onyń ishinde halyqaralyq kýálikterdi berý ishki ister organdarynyń aıryqsha quzyretine jatady. Búginde Qazaqstan Respýblıkasynda halyqaralyq júrgizýshi kýálikteri berilmeıdi.
HJK ulttyq júrgizýshi kýáliginiń ornyn baspaıdy, tek onyń resmı aýdarmasy bolyp tabylady. Atalǵan qujat – shetelde avtokólikti jalǵa alý, jeke kólikpen shekaradan ótý, joldaǵy tekserý barysynda qujattardy kórsetý, shetelde saqtandyrý rásimdeý sekildi kezderde qajet bolýy múmkin.
Halyqaralyq júrgizýshi kýáligin alý úshin emtıhan tapsyrý nemese oqýdan ótý talap etilmeıdi.
Azamattardyń kúmándi onlaın-saıttar nemese jeke fırmalar arqyly kýálik rásimdeýge bergen ótinishteri zańdy kúshke ıe emes.
«Almaty qalalyq polısııa Departamenti, azamattarǵa halyqaralyq júrgizýshi kýáligin berýge quqyǵy joq jeke uıymdarǵa, týrıstik agenttikterge jáne basqa da qurylymdarǵa júginýge bolmaıtynyn eskertedi jáne azamattardy saq bolýǵa jáne alaıaq deldaldardyń arbaýyna túspeýge shaqyrady. Kúmán týyndaǵan jaǵdaıda azamattarǵa aýmaqtyq ishki ister organdaryna júginip, tolyq aqparat alýǵa keńes beriledi», delingen habarlamada.
