Sport • 12 Shilde, 2025

Jarys kúndeligi

80 ret

kórsetildi

3 mın

oqý úshin

14 shildede Almatyda ústel tennısinen 2026 jyly Londonda ótetin álem chempıonatyna joldamalar taratylatyn Ortalyq Azııanyń aımaqtyq irikteý týrnıri bastalady. Jerlesterimiz jaýapty jarys qarsańynda sońǵy daıyndyq jumystaryn pysyqtap jatyr. Elimiz quramasynyń bas bapkeri Elmıra Álıeva BAQ ókilderine bergen suhbatynda: «Qurama músheleri aldaǵy dodanyń mańyzdylyǵy men jaýapkershiligin tolyqtaı túsinip otyr. Osy irikteýde biz barynsha tabysty óner kórsetip, álem chempıonatyna joldama alýǵa nıettimiz», dep málimdedi.

Ǵalym SÚLEIMEN

Aralas jekpe-jekten «The Ultimate Fighter» (TUF) realıtı-shoýyna qatysyp jatqan Álibı Ydyrystyń (11-0) taıaýda ózbekstandyq Fýrkatbek Ekýbovty (15-4) utqany málim. Endi ol jartylaı fınalda Roıbert Echeverrıamen (10-2) kúsh synasady. 29 jastaǵy Venesýelanyń oǵlany tusaýkeser kezdesýinde OAR sportshysy Týmelo Manıamalyny (6-1) «qylqyndyrý» tásilimen utty. Osy kezdesýde jeńiske jetken faıter fınalǵa joldama alady. Jarys jeńimpazy álemdegi eń beldi promoýshen – UFC-de óner kórsetý quqyǵyna ıe bolady.

16 shildede Germanııada alaýy tutanatyn HHHII jazǵy Dúnıejúzilik ýnıversıadada elimizdiń taekvondoshylary qandaı quramda óner kórsetetini belgili boldy. El namysyn Áziret Dúısenbek, Temirlan Tileýles, Samırhon Ábýbákirov, Damır Shúlenov, Maqsat Orynbasar, Batyrhan Tóleýǵalı, Beıbarys Qablan, Nodıra Ahmedova, Aıdana Súndetbaı, Marııa Sevostıanova, Aısha Ádilbekqyzy, Nuraı Qusaıynova, Nazym Mahmudova qorǵaıdy.

Fýtboldan Eýrolıganyń irikteý saıystary bastaldy. ÝEFA-nyń Eýropa lıgasynda baq synap jatqan «Aqtóbe» tusaýkeser kezdesýin Varshavada jergilikti «Legııaǵa» qarsy ótkizdi. Básekeniń taǵdyryn 25 mınýtta Vagan Bıchahchıan soqqan jalǵyz dop sheshti. 17 shildede Aqtóbede uıymdastyrylatyn matchta jerlesterimizge endi tek jeńis qajet.

«Ordabasy» Grýzııaǵa sapar shegip, Kýtaısıdiń «Torpedosymen» kúsh synasty. Uzaq ýaqyt boıy tarazy basy teńselip turǵan oıynda jeti gol soǵyldy. Qorytyndy esepte 4:3 esebimen alań ıeleri jeńiske jetti. Goldardyń avtorlary – Born Ionsen, 30 (1:0), Mıhaı Kepesyne, 32 (1:1), Lýka Imnadze, 35 (1:2), Mateı Shımıch, 45+2 (2:2), Saǵadat Tursynbaı, 69 (2:3), Born Ionsen, 79 (3:3) Mateı Shımıch, 90+4 (4:3). Qarymta match 17 shildede Shymkentte ótedi.

Jartylaı aýyr salmaqta kúsh synasatyn elimizdiń tanymal boksshysy Bek Nurmaǵanbet (14-0, 12 KO) kásipqoı rıngtegi kelesi kezdesýin búgin Meksıkanyń Kýlıkan qalasynda ótkizedi. Ol jergilikti bylǵary qolǵap sheberi Haver Karrera Tınaheromen (15-13, 12 KO) aıqasady.

Tennısshi Zarına Dıas Portýgalııanyń Seıshal qalasynda ótip jatqan ITF W50 týrnıriniń shırek fınalyna shyqty. Ekinshi aınalymda ol japonııalyq Meı Iаmagýchıdi 4:6, 6:3, 6:1 esebimen jeńdi. Endi Zarına chehııalyq Gabrıela Knýtsonmen sheberlik baıqasady. Al Nıderlandtyń Gaaga qalasynda Jibek Qulambaeva sátsiz oınady. Qandasymyz ekinshi kezeńde fransııalyq Djennı Lımge jol berdi. Esep – 6:1, 3:6, 6:3.