Foto: Ashyq derekkóz
«ABAI. Múrseıit qoljazbalaryna súıenip jasalǵan transkrıpsııa» atty bul kitap elimizdegi bedeldi baspalardyń birinde 2000 dana taralymmen basylyp shyqqan.
Zertteý avtorlary – fılologııa ǵylymdarynyń kandıdaty, dosent Aqjol Qalshabek pen PhD doktorant Ázimhan Isabek. Jobany júzege asyrýǵa QR Parlamenti Májilisiniń depýtaty Ardaq Nazarov qoldaý bildirip, eńbektiń keń aýdıtorııaǵa jetýine yqpal etken.
Ǵylymı eńbekte Abaı shyǵarmalarynyń basty qaınar kózi sanalatyn Múrseıit Bikiulynyń qoljazbalary tekstologııalyq jáne termınologııalyq turǵyda tereń saralanyp, basqa derekkózdermen salystyrylǵan.
Sonymen qatar, aqynnyń inisi Halıollaǵa jazǵan hatynyń túpnusqasy men transkrıpsııasy, sondaı-aq Rahym Jandybaev pen Orazke Ýaqbaıuly kóshirgen qoljazbalarmen salystyrý nátıjeleri de engizilgen.
Eńbektiń erekshe mańyzǵa ıe tusy — Abaıdyń 1910 jyly jazylǵan qoljazbasynyń tolyq faksımıle nusqasynyń tuńǵysh ret jarııalanýy.
Kitapqa Qazaqstannyń Memlekettik syılyǵynyń ıegeri, professor Mekemtas Myrzahmetuly resenzııa jazyp, batasyn bergen. Avtorlardyń aıtýynsha, bul eńbek — birneshe jylǵa sozylǵan uzaq ǵylymı izdenistiń jemisi.
«Abaı shyǵarmalaryn túpnusqaǵa súıenip tolyq ári saýatty transkrıpsııalaý — Muhtar Áýezovtiń kózi tirisinde oryndalmaǵan armany edi. Búginde sol arman júzege asty», deıdi avtorlardyń biri Ázimhan Isabek.
712 bettik bul zertteý — abaıtaný salasyndaǵy irgeli jańalyqtardyń biri retinde baǵalanyp otyr.
