QR Týrızm jáne sport mınıstrligine qarasty Oıyn bıznesin jáne lotereıany retteý komıtetiniń tóraǵasy Ádilet Turǵanbaev atap ótkendeı, BEJ júıesi boryshkerlerdiń, sot sheshimi shyqqan tulǵalardyń, memlekettik qyzmetkerlerdiń, áskerı jáne quqyq qorǵaý organdary qyzmetkerleriniń qumar oıyndarǵa qatysýyna avtomatty túrde shekteý qoıady.
Sonymen qatar júıe qatysýshylardy arnaıy tizimder boıynsha tekserip, ruqsat etilmegen azamattardy avtomatty túrde oıynnan shettetedi. Sonymen qatar, sáıkestendirý eki deńgeıde júrgiziledi, onyń biri – bıometrııalyq tekserý.
«Qazirgi ýaqytta bizdiń birinshi kezektegi mindetimiz – kámeletke tolmaǵandardy, boryshkerlerdi, ózin-ózi shektegenderdi jáne zań boıynsha qumar oıyndar oınaýǵa quqyǵy joq basqa da sanattaǵy azamattardyń bás tigýine jol bermeý», - dedi Turǵanbaev.
BEJ sonymen birge adamnyń bás tigýge degen áreketterin taldaı otyryp, táýeldilikke beıim minez-qulyqty erte kezeńde anyqtaıdy. Bás tigýdiń jıiligi men sıpaty taldanyp, qajet bolǵan jaǵdaıda júıe mundaı oıynshylarǵa kómek qajet ekenin eskertedi.
«Biz halyqaralyq tájirıbeni zerttedik. Mysaly, keıbir elde adam shekten asyp ketpeýi jáne táýeldilikke túspeýi úshin bás tigýdiń jıiligin shekteý qarastyrylǵan. Mundaı júıe bás tigýge kóp ýaqyt jumsaǵan oıynshyǵa «oılanyp alý kezeńin» usynady», dedi QR QMA Prevensııalar basqarmasy basshysynyń orynbasary Dáýren Múlikov.
Dáýren Múlikov bul tásil adamnyń aqshadan ǵana emes, ózin-ózi baqylaýdan da aıyrylyp jatqanyn túsinýine kómektesetinin atap ótti.
«Eger adam qaıta-qaıta utylyp, toqtaı almaı jatsa, júıe ony ýaqytsha shekteı alady. Biraq eger ol utsa, - júıe áreketin buǵattamaıdy. Algorıtmder bás tigýdiń jıiligi men sıpatyn eskeredi», dep túsindirdi ol.
Sonymen qatar, BEJ júıesi paıdalanýshylarǵa aı saıynǵy bás tigý sany men kólemine jeke lımıt ornatýǵa múmkindik beredi. Eger oıynshy bul lımıtten asyp ketse, júıe jańa bás qabyldamaıdy.
Dáýren Múlikovtiń deregine súıensek, jyl saıyn shamamen 200 adam qumar oıynǵa baılanysty óz-ózine qol jumsaıdy, biraq densaýlyq saqtaý júıesinde tirkelgender sany óte az. Osyǵan oraı, BEJ júıesi azamattarǵa psıhologııalyq kómek alý qajettiligi jóninde habarlama jiberip, qoldaý kórsetetin ortalyqtarmen baılanys ornatýdy josparlap otyr.
«Júıe adamǵa «sizde problema bar, sizge psıhologııalyq kómek qajet» dep jazady. Biz memlekettik jáne jeke ortalyqtarmen baılanys ornatamyz. Bul tótenshe jaǵdaılarǵa jetkizbeý úshin aldyn alý sharasy bolady», dedi Ádilet Turǵanbaev.
Spıkerlerdiń aıtýynsha, BEJ Qazaqstandaǵy táýeldilikti erte anyqtaýǵa arnalǵan alǵashqy qural bolady jáne myńdaǵan azamatty qaıǵyly jaǵdaıdan saqtaýǵa septigin tıgizedi.
