Foto: kadry.mcfr.kz
Týrızm jáne sport mınıstrligi Oıyn bıznesin jáne lotereıany retteý komıtetiniń tóraǵasy Ádilet Turǵanbaevtyń aıtýynsha, ótken jyly oıyn bıznesine qatysty zańnamaǵa túzetýler qabyldanǵan kezde Biryńǵaı esepke alýdyń júıesin (BEJ) engizý kózdelgen. Bul – býkmekerlik keńseler men olardyń klıentteri arasyndaǵy tranzaksııany, sondaı-aq bás tigýdiń búkil tarıhyn jazatyn platforma.
«Platformanyń basty mindeti - klıentterdi sáıkestendirý jáne adamnyń zań boıynsha oınaýǵa quqyǵy bolsa ǵana bás tigýge múmkindik berý. Biz halyqaralyq tájirıbeni zerttedik. Qazir tehnologııalardyń damýymen onlaın-stavkalar men onlaın-oıyndar, sonyń ishinde býkmekerlik bıznestiń damyp kele jatqanyn eskere otyryp, damyǵan elder osy salany retteýdi memleketke berý jolyn tańdady. Memleket barlyq operasııany onlaın rejımde baqylaıdy. Italııa, Ispanııa, Fransııa, Germanııa, AQSh-tyń keıbir shtattarynda osylaı jasalady», dedi Ádilet Turǵanbaev.
Memleket onlaın-rejımde barlyq operasııany kórip, olardyń zańdylyǵyn baqylap, zańsyz qyzmet túrlerimen, onyń ishinde aqsha qarajatyn jylystatýmen aınalysýǵa jol bermeıtin onlaın-baqylaý quraldaryn engizedi. Býkmekerlik keńseler sııaqty joǵary tehnologııalyq bıznesti memleket tek ozyq tehnologııalardy qoldana otyryp jáne óz jumysyn sıfrlandyrý arqyly ǵana retteı alady.
TSM ókiliniń aıtýynsha, resmı derekter boıynsha eldegi zańdy oıyn naryǵynyń aınalymy 1,3 trln teńgeni quraıdy. Onda 2,5 mln jýyq klıent tirkelgen. Onyń ishinde 450 myńǵa jýyq qazaqstandyq turaqty túrde oınaıdy. Al ótken jylǵy zertteý derekteri boıynsha, 500 myń adam zańsyz býkmekerlik keńselerde oınaǵan. Olar salyq tólemeıdi, al qarjy shetelge – offshorlarǵa ketedi.
Onlaın-júıeniń mindeti zańdy sektordy rettep, baqylaý ǵana emes, jasandy ıntellekt arqyly zańsyz saıttardy anyqtap, buǵattaý jáne azamattar men el ekonomıkasyn qarjyny syrtqa shyǵarmaýdan qorǵaý.
«Biryńǵaı esepke alý júıesi – barlyq qajetti tekserýden ótetin memlekettik aqparattyq júıe. Júıe úsh komponentten turady: birinshisi – qumar oıyndarǵa qol jetkizýdi baqylaý jáne olarǵa táýeldi bolý qaýpi bar azamattardyń sanattaryna qoljetimdilikti buǵattaý, ekinshisi - zańsyz naryqpen kúresý, kúnine 1000-ǵa deıin zańsyz ınternet-resýrstardy buǵattaý, úshinshi komponent - oıynshylardyń múddelerin qorǵaý úshin stavkalardy óńdeý», dep túsindirdi Týrızm jáne sport mınıstrligi Oıyn bıznesin jáne lotereıany retteý komıtetiniń tóraǵasy.
