Foto: Májilistiń Baspasóz qyzmeti
Sapar aıasynda depýtat Kamennyı Brod aýylyndaǵy «Saýmalkól Agro» JShS ujymymen kezdesip, memleket tarapynan kórsetilip jatqan qoldaý tetikteri men jeńildetilgen nesıe sharttaryn túsindirdi.
«Aýylǵa kelýimizdiń basty sebebi – kóktemgi egin naýqanynan keıingi ahýaldy baǵalaý. Aldymyzda oraq maýsymy kele jatyr. Búgin, mine, osy sharýashylyqta kúzde egilgen qara bıdaıdy orý naýqany bastalmaq. Ujym bizden ony sımvolıkalyq túrde bastap berýimizdi surady. Jalpy jaǵdaı jaman emes. Eńbekkerler jalaqysyn ýaqytyly alýda, jem-shóp máselesi de sheshimin taýyp jatyr», dedi Serik Egizbaev.
Serik Egizbaev 2023 jyly sharýalar úshin qıyn kezeń bolǵanyn, sol ýaqytta bankterden 22 paıyzdyq mólsherlememen nesıe alýǵa májbúr bolǵanyn eske saldy. Alaıda Memleket basshysynyń bastamasymen aýyl sharýashylyǵyna beriletin nesıeler búginde 5 paıyzǵa deıin tómendep, kepil sharttary jeńildegenin aıtty. Sondaı-aq, depýtat fermerler úshin QQS-ty esepteýdiń 16/80 úlgisi boıynsha ózgergenin jáne bul ózgerister Májilis depýtattarynyń bastamasymen engizilgenin atap ótti.
Sonymen qatar agroónerkásiptik keshendi qarjylandyrý kólemi birneshe ese ósip, 140 mlrd teńgeden 700 mlrd teńgege deıin artqanyna toqtaldy. Bul jetistik – Parlamenttiń júıeli jumysy men Prezıdenttiń naqty saıası sheshimderiniń nátıjesi ekenin jetkizdi.
Sapar barysynda Serik Egizbaev egis alqaptaryn aralap, dala jumystarymen tanysty. Aýyl eńbekkerlerimen tildesip, olardyń usynystary men pikirlerin tyńdap, óz jumysynda eskerýge ýáde berdi.
