«Internet jetken núkteden»

depýtat aýyl turǵyndaryn qabyldady Oblystyq máslıhat depýtaty Dmıtrıı Gýsak Fedorov aýdanyndaǵy Peshkov aýyly turǵyndarynyń ótinishin skaıp arqyly tyńdady. Bul «Nur Otan» partııasy men «Qazposhta» aksıonerlik qoǵamy birlesip jasaǵan «Internet jetken núkte» respýblıkalyq jobasynyń tusaýkeseri bolatyn. Aýyldastar men depýtattyń skaıp arqyly kezdesýi birden tıimdiligin kórsetti. Oblys or­talyǵynan 120 shaqyrym jerde jatqan Peshkov aýylynan oblys ortalyǵyna at sabyltý turǵyndar úshin ońaı emes. Aýyl poshtasyna ornaǵan «skaıpqa» aldymen Peshkov selolyq okrýginiń ákimi Ámirbek Erjanov shyqty. Ol oblystyq máslıhat depýtaty Dmıtrıı Gýsakqa aýyldyń jıyrma jyl boıy aýyzsý azabyn tartyp otyrǵanyn aıtty. 2008 jyly geologııalyq barlaý ekspedısııasy aýyldan bir ret burǵylaǵanda sý ashy bolyp shyqqan. Sodan keıin bul másele qozǵalǵan emes, al aýyldastar sýdan taryǵyp otyr. – Aýyzsý shalǵaı aýyl úshin ótkir másele ekeni anyq. Burǵylaý jumysy qarjyǵa keletin másele. Sondyqtan ol jerde jerasty tushy sýy bar ma, joq pa sony bilip alýymyz qajet, – dedi oblys máslıhatynyń depýtaty Dmıtrıı Gýsak. Ol aýyl ákimine aldymen jobalyq-smetalyq qujattar, aýdan ákimine, oblystyq máslıhatqa, «Nur Otan» partııasynyń ob­lystyq fılıalyna aýyl tur­ǵyndarynyń, aýyl ákiminiń atynan hat jazylý qajettigin túsindirdi. Depýtat hatty alǵan soń, bul máseleni máslıhat sessııasynda kóteretindigin, Peshkov aýylynan tushy sý tabý, aýyzsý qubyryn tartý jumystaryna qajetti qarjy 2016 jyldyń bıýdjetine júktelýine kúsh salatyndyǵyn da aıtty. Munan keıin Peshkov aýylynyń turǵyny Rıta Gýz depýtatqa «aýylǵa kógildir otyn qubyry qashan tartylady?» dep suraq qoıdy. Peshkov aýylynda 2800 adam turady. Bir mektep, eki balabaqsha bar, jaqynda aýrýhana salyndy. Osynyń barlyǵy ot jaǵyp jylytylady. Aýyl turǵyny órkenıettiń jemisin kórgisi keletindigin aıtty. Dmıtrıı Gýsak aýdan ortalyǵy – Fedorov aýylyna 2017 jyly gaz qubyryn tartý josparlanǵanyn, aldymen ol jerge taratý stansasy  salynýy tıis ekendigin túsindirdi. Sodan keıin ǵana aınalasyndaǵy eldi mekenderdiń gazdandyrylýy sheshiledi. Fedorov pen Peshkovtyń arasy 25 shaqyrym bolady. Gaz qubyryn tartýǵa bul alys qashyqtyq bolyp sanalady, mıllıondaǵan teńge qarjy ketedi. Gaz qubyrynan buryn, onyń jobalyq-smetalyq qujattaryn jasaýǵa, sol úshin qarjy suraýdy sheshý kerek ekendigin aıtty depýtat. Aınaldyrǵan sút pisirim ýa­qytta alystaǵy Peshkov aýy­lynyń turǵyndary oblystyq máslıhat depýtatynan ózin tolǵandyrǵan saýaldarǵa jaýap aldy. Bastysy «Aıshylyq alys jerlerden jyldam habar alǵyzǵan» órkenıet jemisi – ınternet múmkindigi degen osy. Úıde otyryp, úlken máseleni sheshýge bolady. Názıra JÁRIMBETOVA, «Egemen Qazaqstan». QOSTANAI.