Foto: kasipodaq.kz
Sezge 300-ge jýyq delegat, shetel uıymdarynyń ókilderi, onyń ishinde Halyqaralyq eńbek uıymynyń Eńbekkerler qyzmeti jónindegi bıýro dırektory Marııa Helena Andre, Halyqaralyq kásipodaqtar konfederasııasynyń bas hatshysy Lıýk Trıangl, osy konfederasııanyń Búkileýropalyq aımaqtyq keńesiniń (BEAK) bas hatshysy Ester Lınch, prezıdenti Igor Zýbký, Grýzııa, О́zbekstan, Ázerbaıjan, Japonııa, Polsha, taǵy basqa da elderdiń ulttyq kásipodaq ortalyqtarynyń basshylary qatysty.
Keleli keńeste Kásipodaqtar federasııasy Bas keńesiniń keıingi bes jyldaǵy esebi tyńdaldy. Federasııa tóraǵasy Satybaldy Dáýletalın esep bere kelip, uıymnyń maqsat-muraty týraly baıandady.
«Kásipodaq bar jerde qaýipsizdik bar. Qaýipsizdikti ujymdyq sharttar arqyly úılestiremiz. Qazir 16 myńnan astam ujymdyq shartymyz bar. Kásipodaqqa qosylǵan mekemeler ujymdyq shartpen qamtylǵan. Ujymdyq shartty kishi Konstıtýsııamyz dep aıtsaq bolady. Ol kásiporyndardaǵy eńbek, áleýmettik qatynastardy retteıtin qujat. Jýyrda zań klınıkasyn qurdyq. Onda mamandar táýlik boıy eńbek adamdaryna quqyqtyq kómek kórsetedi. Kásipodaq federasııasyna 6 myńnan astam ótinish tústi. Sondaı-aq salalyq uıymdar, bastaýysh uıymdarǵa kelgen ótinishter tipti kóp. Sotta 247 is jumysshylardyń paıdasyna sheshilip, 3,7 mlrd teńge kólemindegi eńbekaqy bereshegi qaıtaryldy. Qazir eldegi barlyq fılıal jumys isteıdi. Jumysshylardan túsetin ótinishterdiń basym bóligi jalaqy máselesin kóteredi. Kez kelgen kásipodaq múshesi, ıaǵnı jumysshy qaıda júrse de, zańgerlerge habarlasyp, quqyqtyq kómek alýy kerek. Biz osy baǵytta jumys istep kelemiz», dedi S.Dáýletalın.
Delegattar Memleket basshysynyń 2025 jyldy Jumysshy mamandyqtary jyly dep jarııalaý bastamasyn zor yqylaspen qoldady. Bul sheshim – jumysshy mamandyqtarynyń mártebesin kóterýge, eńbekqorlyq pen kásibılik ıdeıasyn ilgeriletýge, eńbek adamynyń qoǵamdaǵy bedelin arttyrýǵa baǵyttalǵan mańyzdy qadam. Sezdiń úndeýi – «О́zgerister dáýirindegi ádil eńbek: qorǵaý, damý, ınnovasııalar». Taqyryp Memleket basshysynyń ádildikti qamtamasyz etý, «Ádiletti Qazaqstan» qaǵıdatyn iske asyrý týraly negizgi tujyrymymen tamyrlas.
«Biz elimizdi álemdik kásipodaqtar keńistigine qaıta alyp shyqtyq. Elimiz Halyqaralyq eńbek uıymynyń eńbek quqyqtarynyń buzylýy jóninde jasalǵan «qysqa tizimnen» shyǵaryldy, Halyqaralyq kásipodaqtar konfederasııasyna qaıta múshe bolyp kirdi. HEU-men birlesken Jol kartasyna qol qoıyldy. Bul – elimizdiń eńbek salasyndaǵy jetistikteriniń halyqaralyq deńgeıde moıyndalǵanynyń aıǵaǵy», dedi S. Dáýletalın.
Kásipodaqtar eńbek adamynyń mártebesin kóterip, olardyń áleýmettik jaǵdaıyn jaqsartýǵa yqpal etýdi kózdeıdi. Sezde federasııanyń aldaǵy bes jylǵa arnalǵan damý baǵyty, strategııasy aıqyndaldy. Strategııanyń jobasy aldyn ala barlyq óńirde, salalyq kásipodaqtarda talqylanǵan. Sezde qorytyndy qaýly ǵana qabyldandy.
«Kásiptik odaqtar – qoǵamnyń ajyramas bóligi. Olardyń qyzmetiniń negizgi qaǵıdattary – árqashan eńbekkerlerdiń quqy men múddesin qorǵaý. Eńbek adamy – qoǵamymyzdyń basty qundylyǵy. Biz Prezıdent Qasym-Jomart Toqaevtyń eldi túbegeıli jańǵyrtýǵa, saıası reformalar men áleýmettik-ekonomıkalyq ózgeristerge baǵyttalǵan strategııalyq baǵytyn qoldaımyz», delingen qaýlyda.
