Keıingi jyldary elimizde halyqaralyq deńgeıdegi mádenı is-sharalar jıi ótetin boldy. Mysaly, jaqynda álemge áıgili «Backstreet Boys» tobynyń elimizge keletini týraly habar tarady. Bul oqıǵa mádenı týrızm men kreatıvti ındýstrııany damytýǵa serpin berýge tıis. Ári elimizdiń bedelin arttyryp, jańashyl qundylyqtardy qoldaıtyn memleket retinde tanylýyna yqpal etedi. Demek oqıǵaly týrızm – el brendin, ulttyń mádenı murasyn áspettep kórsetýdiń tıimdi joly. Mundaı is-sharalarǵa ádette mádenıet, bıznes ókilderi, volonterler, jastar jıi tartylady. Mádenıet jáne aqparat mınıstrligi Mádenıet komıteti tóraǵasynyń orynbasary Azamat Belqaıyrov baspasóz konferensııasynda «Backstreet Boys» tobynyń konserti jeke ınvestısııa esebinen uıymdastyrylatynyn málim etti.
«Jobany jeke uıymdastyrýshylar iske asyrady. Memlekettik bıýdjetten qarajat bólinbegen. Alaıda Mádenıet jáne aqparat mınıstrligi yqylas tanytyp, aqparattyq qoldaý kórsetip otyr. Atap aıtqanda, mádenı jobalardy úılestirý, aqparattyq súıemeldeý, memlekettik jergilikti atqarýshy organdarmen ózara kelisim qamtamasyz etilip jatyr. Bul – memleket pen bıznestiń tıimdi yntymaqtastyǵynyń naqty úlgisi. Konsert jaı ǵana shoý emes, elimizdiń jańa mádenı kelbetin qalyptastyrýǵa baǵyttalǵan mańyzdy qadam. Mundaı bastamalardy qoldaı otyryp, elimizdi mádenı, týrıstik baǵyt retinde álemge tanyta bergimiz keledi. Bul mınıstrlik iske asyryp otyrǵan aýqymdy jumystyń bir baǵyty ǵana», dedi A.Belqaıyrov.
Ulttyq statıstıka bıýrosynyń málimetinshe, byltyr elordaǵa 1,5 mln týrıst kelgen. Onyń 350 myńy – sheteldik qonaqtar. Bıyl shamamen 1,7 mln týrıst keledi degen boljam bar. Ázirge birinshi toqsanda elordaǵa 300 myń qonaq kelse, onyń 68 myńy – sheteldikter. Búginde elorda saıası, iskerlik ortalyq qana emes, mádenı is-sharalar jıi ótetin qalaǵa aınaldy. Astana qalalyq týrızmdi damytý ortalyǵynyń basshysy Artem Kvashýktyń aıtýynsha, «Backstreet Boys» tobynyń konserti sııaqty aýqymdy is-sharalardy ótkizý qalaǵa birinshi kezekte tólem qabileti joǵary týrısterdi tartady. Ári halyqaralyq arenada Astana qalasyna degen qyzyǵýshylyqty arttyrady. Konsert kúni qonaqúıler tolyp, meıramhanalarda, mádenı nysandarda, kórikti jerlerde adam úzilmeıdi. Bir konserttiń ózi birneshe baǵyttyń damýyna serpin beredi.
«Qalanyń ınfraqurylymy kez kelgen deńgeıdegi is-sharany ótkizýge daıyn. Munda 300-ge jýyq qonaqúı bar. Onyń 9-y – 5 juldyzdy, 100-den astamy – 3-4 juldyzdy. Jyl ótken saıyn Astana «Oqıǵalar qalasy» mártebesin nyǵaıtyp keledi. Byltyr 128 halyqaralyq is-shara ótti. Bıyl 200-den astam is-shara uıymdastyrylmaq», dedi A.Kvashýk.
Batys Eýropada 10 myń adamǵa arnalǵan konsert orta eseppen shaǵyn jáne orta bıznes nysandaryna 1 mln dollardan astam qosymsha tabys ákeledi eken. Bul degenińiz – qonaqúı bıznesin damytýǵa nıetti ınvestorlarǵa úlken belgi. Qoryta kele, «Backstreet Boys» toby 21 qyrkúıekte Astanada alǵash ret óner kórsetetinin habarlaımyz. Bıletter 14 shildeden satylymǵa shyǵady.
