Ulttyq Bank tóraǵasynyń aıtýynsha, teńge baǵamyna áser etýshi faktorlar ishki jáne syrtqy jaǵdaılarǵa baılanysty. Syrtqy jaǵynan alǵanda, álemdik naryqta geosaıası táýekelderge baılanysty qubylmalylyq saqtalyp otyr. Saýda soǵystary men Reseı rýbliniń nyǵaıýy da osy úderisterdiń qatarynda. Sonymen qatar munaı baǵasy shamamen bir barrel úshin $70 deńgeıinde turaqtady.
Ishki faktorlarǵa kelsek, jyldyń alǵashqy aılarynda ımport kóleminiń azaıýy jáne eksporttaýshylardyń salyq tólemderine baılanysty valıýta usynysynyń artýy teńgege qoldaý kórsetti.
Alaıda sońǵy ýaqytta, naqty aıtqanda ótken aıdyń ekinshi jartysynan bastap valıýta naryǵynda suranys artyp keledi. Buǵan, birinshiden, jazǵy demalys maýsymynyń bastalýy áser etse, ekinshiden, bıýdjettik baǵdarlamalar aıasyndaǵy memlekettik satyp alýlardyń belsendi júrýi zańdy tulǵalar tarapynan shetel valıýtasyna degen suranysty ulǵaıtqan.
«Jalpy alǵanda, syrtqy orta – turaqty, al ishki faktorlar maýsymdyq sıpatqa ıe. Bul jaǵdaıda teńge baǵamynyń aıtarlyqtaı ózgerýine negiz joq. Ulttyq Bank teńgerimsizdiktiń jınalýyna jol bermeıtin ıkemdi baǵam saıasatyn jalǵastyra beredi», dedi Tımýr Súleımenov.
Otyrys barysynda teńgeniń qazirgi deńgeıi men naryqtaǵy jaǵdaı turaqty dep baǵalanyp, makroekonomıkalyq tepe-teńdikti saqtaý baǵytyndaǵy saıasat óz jalǵasyn tabatyny aıtyldy.
