Ekonomıkalyq ósimge áser etken negizgi salalar qatarynda qurylys, saýda, ónerkásip jáne baılanys salalary atap ótildi. Bul baǵyttardaǵy belsendilik pen ınvestısııalyq serpin ekonomıkanyń jalpy qurylymyndaǵy tepe-teńdikti qamtamasyz etip otyr.
«Memleket basshysynyń tapsyrmalaryn oryndaý aıasynda Úkimet júıeli sharalar qabyldap, naqty iske asyrýda. Ekonomıkada turaqty ósim bar. Investısııalardyń belsendi tartylýy iri ınfraqurylymdyq jobalardy bastaýǵa yqpal etti», dedi Premer-mınıstr.
Investısııalyq jobalar tek iri qalalarda emes, óńirlik deńgeıde de qurylys pen óndiris belsendiligin arttyryp, jumys oryndaryn qurýǵa, salyqtyq túsimderdiń ósýine negiz bolyp otyr.
Sondaı-aq Úkimet otyrysynda Memleket basshysy Ortalyq Azııadaǵy alǵashqy sýperkompıýter klasterin iske qosqany da erekshe atap ótildi. Bul zamanaýı qural jasandy ıntellekt, úlken derekterdi óńdeý, úlgileý jáne boljaý sııaqty salalarda otandyq múmkindikterdi keńeıtip, sıfrlandyrý arqyly basqarý tıimdiligin arttyrýǵa jol ashady.
Sýperkompıýterdi qoldaný ekonomıkalyq taldaý men josparlaý sapasyn arttyrýǵa, sondaı-aq ashyqtyq pen jedel sheshim qabyldaý múmkindigin keńeıtýge múmkindik beredi. Bul – eldegi sıfrlyq egemendikke baǵyttalǵan mańyzdy qadam.
