«Ýımbldon» dodasy aıaqtaldy

Irikteý saıystaryna eli­mizdiń tórt oıynshysy qatysqan edi. О́kinishke qaraı, Dmıtrıı Popko, Mıhaıl Kýkýshkın, Tımofeı Skatov syndy tanymal oıynshylar bul synaqtan óte almady. Bul rette tek Beıbit Juqaevtyń joly boldy. Biraq ol da alysqa shaba almady. Negizgi jarystyń tusaýkeser kezdesýinde qazaq tennısshisi ıtalııalyq Flavıo Kobollıge (3:6, 6:7, 1:6) ese jiberdi. Sondaı-aq Aleksandr Býblık ıspanııalyq Haıme Mýnardan (4:6, 6:3, 6:4, 6:7, 2:6), Aleksandr Shevchenko amerıkalyq Raılı Opelkadan (3:6, 5:7, 6:7) aılasyn asyra almady. Iýlııa Pýtınseva AQSh-tyń ókili Amanda Anısımovamen bolǵan básekede birde-bir geımde jeńiske jete almaı, taza utyldy, esep – 0:6, 0:6.

Elimizdiń eń úzdik tennıs­shisi Elena Rybakına bastapqy básekede armenııalyq Elına Avanesıandy (6:2, 6:1) tyrp et­kizbeı tize búktirdi. Ekinshi ke­zeńde grekııalyq Marııa Sak­karımen sheberlik baıqasty. Eki settik báseke jerlesimizdiń aıqyn jeńisimen aıaqtaldy (6:3, 6:1). Alaıda úshinshi aınalymda Elena bilgeninen jańyl­dy. WTA reıtınginde ózinen
10 saty tómen turǵan 22 jastaǵy danııalyq Klara Taýsonnan oıda joqta jeńildi – 6:7, 3:6. Sonymen, «Ýımbldon-2022» jarysynyń jeńimpazy, byltyr jartylaı fınalǵa deıin jetken E.Rybakına bıyl sol kórsetkishterine ja­qyndaı da alǵan joq.

Juptyq saıystarda da jolymyz bolmady. Chehııalyq Marııa Boýzkovamen ıyq tirese oınaǵan Anna Danılına ekinshi kezeńde Veronıka Kýdermetova (Reseı) men Elıze Mertenske (Belgııa) jol berdi. Mıkste de Danılına tusaýkeser kezdesýde jeńilistiń kermek dámin tatty. Sol sekildi saıystyń osy túrlerinen baq synaǵan basqa tennısshilerimiz de osaldyq tanytty.

Kásipqoı tennısshilerimiz óz jan­kúıerlerine qýanta alma­ǵanymen, «Ýımbl­donda» jas­tar býyny ókilderi táýir óner kórsetti. Ásirese Ámir Omar­hanovqa rıza boldyq. Reseılik Egor Plıshıvsevpen jup qurǵan ol jartylaı fınalǵa deıin jetti. Bul mejede olar Oskar Palandıýs (Fınlıandııa)/Alan Vajnyǵa (Polsha) jol berdi, esep – 4:6, 6:4, 5:10. Sol sekildi shırek fınalǵa deıin jetken Zańǵar Nurlanuly men Damır Jalǵasbaıdyń da óneri jaqsy áser qaldyrdy.

Jalpy, bıylǵy «Ýımbl­donda» kóptegen sensasııalyq nátıjeler tirkeldi. Máselen, erler men áıelderdiń reıtınginde TOP-10-dyqqa engen segiz birdeı saqa sportshy alǵashqy aınalymnan asa almady. Atap aıtsaq, Danııl Medvedev (Reseı, ATR №9) Benjamen Bonzıden (Fransııa), Aleksandr Zverev (Germanııa, №3) Artýr Rınderkneshnen (Fran­sııa), Lorenso Mýzettı (Italııa, №7) Nıkoloz Basılashvılıden (Grýzııa), Holger Rýne (Danııa, №8) Nıkolas Harrıden (Chılı), Korı Gaýff (AQSh, WTA №2) Daıana Iаstremskaıadan (Ýkraına), Djessıka Pegýla (AQSh, №3) Elızabetta Kochcharettodan (Italııa), Chjen Sınven (Qy­taı, №5) Katerjına Sınıa­kovadan (Chehııa), Paýla Badosa (Ispanııa, №9) Ketı Býlter­den (Ulybrıtanııa) utyldy. Bu­ryn-sońdy «Úlken dýlyǵa» sana­tyndaǵy básekelerde dál mundaı jaǵdaı tirkelmegen.

Erler básekesinde ATR reı­tınginde alǵashqy alty oryndy ıelenip otyrǵan tennısshiler jartylaı fınalǵa esh kedergi­siz jetti. Bul mejede ıtalııa­lyq Iаnnık Sınner (ATR №1) serbııalyq Novak Djokovıchti (ATR №6) jeńdi. Dańqy jer jarǵan 38 jastaǵy Djokovıch 23 jastaǵy Sınnerge jarytyp qarsylyq kórsete almady – 6:3, 6:3, 6:4. Ispa­nııalyq Karlos Alkaras (ATR №2) pen ame­rıkalyq Teılor Frıs (ATR №5) arasyndaǵy báseke alǵashqysynyń paıdasyna sheshildi – 6:4, 5:7, 6:3, 7:6. Fınalda álemniń birinshi, ekinshi raketkalary ózara kúsh synasty. Bul básekede Iаnnık Sınner 4:6, 6:4, 6:4, 6:4 esebimen jeńiske jetti.

Áıelder arasyndaǵy fınalda amerıkalyq Amanda Anısımova men polshalyq Iga Shventek sheberlik baıqasty. Sonyń aldynda ǵana AQSh-tyń ókili álemniń birinshe raketkasy belarýstik Arına Sobolenkoǵa san soqtyrsa, qart qurlyqtyń ókili Olımpıada chempıony, shveısarııalyq Be­lında Benchıchten basym tústi. Sheshýshi synda Shventek Anı­sımovaǵa adym ashtyrmaı, 6:0, 6:0 esebimen tas-talqanyn shyǵardy. Match nebári 57 mınýtke sozyldy. Dál osyndaı nátıje «Úlken dýlyǵa» dodalarynda 1988 jyly tirkelgen. Sol kezde «Rolan Garrosta» Shteffı Graf Natalıa Zverevany taza utqan edi. Al «Ýımbl­donda» osyndaı jaǵdaı osy­dan 114 jyl buryn bolǵan. Sóıtip, Iga Shventek tuńǵysh ret «Ýımbldonnyń» jeńimpazy atandy.

Jarystyń jekeleı saıys­tarynyń jeńimpazdary osy joly 3 mıllıon fýnt-sterlıngi ($4 mln) oljalady. Fınalda utyl­ǵandarǵa joǵarydaǵy somanyń teń jartysy buıyrdy. Jartylaı fınalǵa jetkender 775 000-nan ($1 mln) ıelense, shırek fınalǵa shyqqandar 400 000-nan ($540 000) enshiledi. Tipten tusaýkeser kezdesýlerinde utylǵan oıynshylardyń ózderi syıaqysyz qalmaıdy. Olarǵa 66 000 fýnt-sterlıng ($89 000) tıesili.