ASTANA. 7 mamyr. Búgin astanadaǵy «Qazaq eli» monýmenti alańynda Memleket basshysy, Qazaqstan Qarýly Kúshteriniń Joǵarǵy Bas qolbasshysy Nursultan Nazarbaevtyń qatysýymen Otan qorǵaýshy kúni men Uly Otan soǵysyndaǵy Jeńistiń 70 jyldyǵyna arnalǵan áskerı parad ótti. Bul týraly egemen.kz tilshisi habarlady.
Bul parad ótken jyldardaǵy sherýlerge qaraǵanda kórneki, qatysýshylar sany jaǵynan eń aýqymdy boldy. Oǵan elimiz Qarýly Kúshteriniń áskerı qyzmetshileri men áskerı tehnıkanyń rekordtyq sany tartyldy.
Paradqa 5 000-ǵa jýyq áskerı qyzmetshi, 200 birlik shamasynda qarý-jaraq pen áskerı tehnıka, áskerı avıasııanyń 70 birlik ushaǵy men tikushaǵy qatysty.
Qazirgi zamanǵy QR Qarýly Kúshterimen qatar Uly Otan soǵysy ýaqytyndaǵy armııa men qarý-jaraq túrleri kórsetildi.
Osy oraıda tý ustaýshy toptardyń Qazaqstan Respýblıkasy Memlekettik týy men osydan 70 jyl buryn otandasymyz Raqymjan Qoshqarbaev pen onyń jaýynger dosy Grıgorıı Býlatovtyń Reıhstagqa tikken týynyń dál kóshirmesi – Jeńistiń qyzyl týyn alańǵa alyp shyǵý erekshe rásim bolyp usynyldy.
Jaıaý tizbekter sherýin armııa generaly Saǵadat Nurmaǵambetov atyndaǵy «Jas ulan» respýblıkalyq mektebiniń barabanshylar rotasy ashty.
Olardyń sońyna ilese Uly Otan soǵysy ýaqytyndaǵy áskerı kıim úlgisindegi úsh paradtyq top júrip ótti. Birinshi top Uly Otan soǵysy kezinde quramynda bizdiń jerlesterimiz soǵysqan 72 gvardııalyq atqyshtar dıvızııasy jaýyngerlik týynyń kóshirmesin ustap ótti.
Saltanatty sapty Qorǵanys mınıstrliginiń, Qurlyq áskerleriniń, Áýe qorǵanysy kúshteriniń jáne Áskerı-teńiz kúshteriniń ofıserlerinen quralǵan paradtyq toptar jalǵastyrdy. Parad kórermenderi Aeroutqyr áskerleriniń, teńiz jaıaý áskerleriniń, bitimgershilik kúshterdiń, arnaıy maqsattaǵy, áskerı qyzmetshi qyz-kelinshekterden quralǵan rotalardy, áskerı polısııa rotasyn jáne basqalardy kórdi.
Tarıhı bólimdegi áskerı tehnıkanyń tizbegin ózdiginen júrip ótken T-34 tanki bastady. Sonymen birge tarıhı bólimde paradtyq tizbektiń quramynda
ZıL-157 súıretken ZIS-2 zeńbirekteri jáne M-30 gaýbısalary, aty ańyzǵa aınalǵan BM13 RS-30 «Katıýsha», tanymal «Maksım» pýlemeti, RPD (Degtıarev qol pýlemeti), PPSh (Shpagın tapansha-pýlemeti) ótti.
Paradtyń zamanaýı bóliminde áskerı tehnıkany basqarylatyn qarýmen jaraqtandyrylǵan T-72B tanki bastady. Sonymen birge alańda tankterdi qoldaý jaýyngerlik mashınalary, sońǵy jyldary qazaqstandyq armııanyń sapyna alynǵan ákelingen jaýyngerlik mashınalar, «Solnsepek», jaıaý ásker jaýyngerlik mashınalary, BTR-82 bronetransporterleri, D-30, «MSTA» gaýbısalary, KamAZ avtokólikteri, «Tıgr» brondy kólikteri, «Kobra» jaýyngerlik barlaý kólikteri jáne basqa da zamanaýaı áskerı tehnıka ótti.
Paradta avıa-shoýdyń orny erekshe mańyzǵa ıe boldy. Bular maıdandyq, áskerı-kóliktik jáne armııa avıasııasynyń Sý-25, Sý-27, Sý-30, MıG-29, MıG-31, MıG-27, An-26, An-72, Tý-134, Tý-154, S-295 (Airbase Military) ushaqtary, sondaı-aq Mı-8, Mı-17, Mı-171, Mı-26, K-32 jáne ES-145 (Evrokopter) tikushaqtary.
Budan basqa paradqa QR Qarýly Kúshteriniń tarıhynda tuńǵysh ret qazaqstandyq Áskerı-áýe kúshteriniń sapyn tolyqtyrǵan 4++ býynyna jatatyn jańa joǵary manevrli Sý-30SM joıǵysh ushaǵy qatysty.
Áskerı ushqyshtar jeke jáne pılotajdy top quramynda joǵarǵy pılotaj fıgýralaryn oryndap, óz sheberlikterin kórsetti. Avıatorlar Uly Jeńistiń mereıtoıyn bildiretin «70» sanyn áýede beınelep barsha kórermenderge syı jasady.
Dastan Kenjalın.
Derek, sýret: Qazaqstan Respýblıkasy Qorǵanys mınıstrligi
