Negizinen ósim kóterme saýdanyń 45%-dan astamyn quraıtyn 9 negizgi taýar toby esebinen boldy. Onyń qatarynda munaı men munaı ónimderi, gaz, turmystyq tehnıka, uıaly telefon, farmasevtıkalyq ónimder, mashına jasaý, astyq pen temeki ónimderi bar. Atalǵan taýarlardy jyl sońyna deıin ótkizýdiń boljamdy kólemi 26,4 trln teńgeni quraıdy. Osy rette ishki óndiris úlesin arttyrý arqyly sol kólemdi qamtamasyz etýge erekshe kóńil bólinedi.
«Jartyjyl qorytyndysy boıynsha eldiń barlyq óńirleri oń dınamıka kórsetti. Saýda ósimine eń kóp úles qosqan óńirler – Almaty, Astana, Shymkent qalasy, sondaı-aq Atyraý men Qaraǵandy oblysy. Bul óńirlerdiń úlesine jalpy taýar aınalymynyń 72%-y tıesili», dedi A.Shaqqalıev.
Saýda ósimi boıynsha kóshbasshy óńirler: Túrkistan oblysy (+69,3%), Aqmola oblysy (+45,4%) jáne Pavlodar oblysy (+22,3%).
Mınıstrlik saýda salasyn 3 negizgi baǵytpen júıeli túrde damytyp jatyr. Birinshi – saýdanyń zamanaýı formattaryn ilgeriletý. Yntalandyrý tetigi engizilip, zańnamaǵa ózgeris engizildi. Bıyl ishki saýda sýbektilerin qoldaýǵa 5,2 mlrd teńge qarastyrylǵan. Negizgi kapıtalǵa ınvestısııa tartý belsendi túrde jalǵasýda. Jospar – 1 220 mlrd teńge. Saýda salasynda jalpy somasy 168,4 mlrd teńge bolatyn 33 nysannan turatyn Ulttyq ınvestısııalyq jobalar pýly qalyptasty. Sonymen qatar bólshek saýda naryǵyn jańǵyrtý aıaqtalýǵa jaqyn.
Ekinshi – elektrondyq saýdany damytý. Jarty jylda e-commerce naryǵynyń kólemi 10%-dan astam ósip, bólshek segmentte 1,5 trln teńgege jetken. Onyń ishinde 1,3 trln teńgesi Kaspi.kz, Hayk market, Forte, Jusan, Ozon jáne Wildberries sııaqty alty iri marketpleıs arqyly qamtamasyz etildi. Ekinshi jartyjyldyqta draıverler retinde tórt dark store ortalyǵynyń iske qosylýy, eki fýlfılment-ortalyq qurylysynyń aıaqtalýy men Qazposhtanyń mýltımodaldy logıstıkalyq ortalyq jelisin iske asyrý bastalady. Sondaı-aq, Kaspi men Qazposhtanyń seriktestigi aıasynda Qazaqstan – Qytaı baǵyty boıynsha B2B formatyndaǵy elektrondyq platforma iske qosylady.
Úshinshi – kóleńkeli saýdany azaıtý. Mınıstrlik taýardy katalogtaý men qadaǵalaý boıynsha sharany dáıekti túrde júzege asyryp júr. Ulttyq taýar klassıfıkatory (OKTRÝ) engizilýde, tańbalanatyn taýar pozısııalarynyń tizimi keńeıýde. Qarjy mınıstrligi jáne «Qazaqtelekom» AQ-pen birlesip NKT men EKT ulttyq katalogtarynyń ıntegrasııasy aıaqtalýǵa jaqyn. Ekinshi deńgeıli banktermen birge, naryqtardaǵy taýar aınalymyn sıfrlandyrý men aqsha aǵynynyń ashyqtyǵyn arttyrýǵa baǵyttalǵan «Digital Bazar» jobasy iske qosylady.
