Bıyl Tabyldy Dosymovtyń mereıjasy. Osyǵan oraı tuńǵysh bard aqynnyń elimizdiń ár túkpirindegi tyńdarmandary, izet tutýshylary ózinshe qam-qareket etýge kirisken. Al 2012 jyly Tabyldy Dosymov atyndaǵy respýblıkalyq qoǵamdyq qor quryp, óner dúldúliniń muralaryn el esinde qaldyrýǵa kúsh salyp júrgen Bıjan Qalmaǵanbetovtiń orny bólek.
– Tabyldy Dosymov san qyrly azamat qoı. Kóp qazaq óleń jazyp, oǵan án shyǵaryp, ózi oryndaýshy bard aqyn dep biledi. Tabyldy degen segiz qyrly, bir syrly tulǵa. Atap aıtsaq, Mahambet О́temisuly atyndaǵy qordy basqarǵan tarıhshy, etnograf, ádebıetshi, sýretshi, kúres sheberi bolǵan balýan, aıta bersek osyndaı qyrlary kóp. Jeltoqsan kóterilisinde jany shyrqyrap «Men qazaqpyn» degen án jazǵan atpal tulǵa. Osyndaı azamatty nasıhattaý barysynda bizdiń qor birshama jumys atqaryp kele jatyr. 2015 jyly keshin Qytaıda ótkizsek, 2019 jyly Máskeýdegi sharasyna dıaspora ókilderi men bir shoǵyr zııaly qaýym qatysty. 2022 jyly Baıan О́lgeıdegi qandastarymyzǵa konsert qoıyp qaıttyq, qordyń uıymdastyrýymen Túrkııanyń Ankara qalasynda kesh berdik. Mundaǵy maqsatymyz Tabyldynyń ánderin keńinen nasıhattaý, shyǵarmashylyǵyn elge jetkizý. Aldyńǵy jyly bard aqynnyń «Samala sazdar saǵymy» atty notalyq jınaǵyn shyǵardyq. Búkil óner mektepterine, kolledjderge, joǵary oqý oryndaryna tarattyq, – deıdi T.Dosymov qorynyń dırektory Bıjan Qalmaǵanbetov.
Mereıtoı qarsańynda Ázirbaıjan Mámbetov atyndaǵy Memlekettik drama jáne komedııa teatrynda Tabyldy Dosymovtyń bolmysyn arqaý etken «Sáıgúlik» mýzykalyq dramasy qoıyldy. Qoıylymda stýdent Tabyldydan azamat, aqyn retinde shyńdalǵan tulǵanyń som beınesi shynaıy kestelengen. Namys pen jigerdi tý etken, dostyq paryzǵa adal, azamattyq ustanymy berik aqyn bolmysy jarqyraı ashyldy. «Qazaq edim degenshe», «Bıiktik», «Anaǵa hat» syndy ánderi janǵa jaryǵyn tókti. Spektaklde Jeltoqsan kúnderiniń zobalańy áserli berilip, ondaǵy aqynnyń ór bolmysy ádiptelgen.
– Bıyl aqynnyń 60 jyldyǵyna oraı merekelik sharalar óziniń týǵan jeri Atyraýdan bastaldy. Tabyldynyń ánderine baılanysty sýretshiler kórmesin ótkizdik. Osy aıda týǵan jeri Denderde Tabyldy Dosymov shyǵarmashylyǵynyń aımaqtyq baıqaýy ótedi. 2021 jyldan bastap respýblıkalyq baıqaýyn Aqtóbe qalasynda ótkizip kelemiz, qyrkúıek aıynyń basynda sol shyǵarmashylyq baıqaý qaıta josparlanyp otyr. Tabyldynyń týǵan jerine eskertkish ornatsaq, derekti fılm túsirsek degen josparymyz bar. Sonymen qatar tuńǵysh bard aqyn murajaıyn ashsam degen arman. Astanada qyrkúıek-qazan aılarynda úlken mereıtoılyq kesh bersek dep otyrmyz, – deıdi B.Qalmaǵanbetov.
Kúresker er, shyǵarmashyl tulǵanyń sıpaty keıingige úlgi. Biz Tabyldy Dosymov bolmysy arqyly bolashaq kemesin enjarlyqtan saqtap, biregeı rýhpen bettestiremiz. Ol – ulttyq rýh dánegi.
