Balzııa Bısenǵalıqyzy ómirden ótken eriniń zattary arasynan eki jyl buryn qaǵazǵa oralyp saqtalǵan 24 túıir tary dánin taýyp alyp, balalaryna kórsetedi. Sodan Rınat dánderdi úıdiń aýlasyndaǵy shıe talynyń túbine egip tastaıdy. 30-35 kún ótkende jas óskinder kóktep shyqqanda, ájesi baıqamaı aramshóp dep jartysyn julyp tastasa da, qalǵandary kúzde jaqsy ónim bergen. «Bıiktigi 1,5 metrden asyp, bitik shyqty. Meniń atam 1936 jyly Oıyl aýdany Qaratal aýylynda dúnıege kelgen. Bul – 1936–1944 jyldary tary ósirýden álemdik rekord ornatqan ataqty Shyǵanaq Berseulynyń týǵan jeri. Atam ataqty taryshynyń zvenosynda eńbek etken úlken kisilerdiń áńgimelerin jastaıynan estip ósken. О́zi de uzaq jyl týǵan jerinde agronom bolyp qyzmet etti, keńshardy basqardy. Shyǵanaqtyń tarysyn saqtaǵany týraly ájemizge de aıtpaǵan. Ájem kezdeısoq taýyp alyp, bizge bergende de 30 jyldan astam saqtalǵan dánderdiń kóktep shyǵatynyna senbegen. Úıde saqtalǵan dánderdiń Shyǵanaq tarysynyń tuqymy ekenine kúmán týǵan. Degenmen biz ósirip bastaǵan daqyl ataqty dıqannyń shyǵarǵan tuqymy ekenine birden-bir dálel – Mahmýd Shyǵanaqulynyń qoljazba derekteri. Soǵysta temirjolshy bolyp, elge oralǵan Mahmýd ákesiniń aq tarysynda úsh qara noqat bolatyndyǵyn jazyp ketken», deıdi Rınat.
Rasynda da, Rınattyń dánderindegi úsh qara noqat birden kózge túsedi, Erekshe kútimdi qajet etetin aq tary soǵystan keıin elde kóp ósirilmedi. Dıqan daqylynyń tuqymdary saqtalmady dep aıtylady. Endi Rınat osy daqylǵa patent alyp, Ashyoıyldyń boıyna, Shyǵanaq ketpeniniń izi qalǵan Qaratalda tary ósirýge nıet etip otyr.
Aqtóbe oblysy
