Túsirilim toby bul joly Baıqońyr men Katon-Qaraǵaı óńirlerine sapar shekti. Epızodtar 2025 jyldyń qyrkúıek aıynda efırge shyǵady dep josparlanyp otyr.
Baıqońyrdaǵy túsirilim barysynda komanda ǵarysh aılaǵynda ótken zymyran ushyrý sátin túsirip úlgerdi. Jylyna alty-jeti ret ótetin mundaı tarıhı oqıǵalar halyqaralyq kórermenniń qyzyǵýshylyǵyn týdyryp otyr. Baǵdarlamada «Gagarın starty», «Býran» kemesi, Baıqońyr mýzeıi, dınamıkalyq synaq stendi men montajdy-otyn quıý kesheni kórsetiledi. Sondaı-aq túsirilim toby Qyzylorda oblysyndaǵy Korqyt ata memorıaldyq kesheni men oblystyq ólketaný mýzeıine de barǵan.
Baǵdarlamanyń ekinshi epızody Katon-Qaraǵaı ulttyq parkine arnaldy. Túsirilim Rahman qaınary men Kókkól sarqyramasynda, sondaı-aq Uryl men Korobıha aýyldarynda ótti. Bul bólimde halyq medısınasyn tanystyrýǵa basymdyq berilgen. Reportajda pantamen emdeý, apıterapııa, tabıǵı shıkizattan jasalatyn bıoqospalar men dárilik ónimder týraly aıtylady.
Kazakh Tourism ulttyq kompanııasynyń málimetinshe, Euronews jobasy elimizdiń ekotýrızmi men mádenı murasyn sheteldik aýdıtorııaǵa keńinen tanytýǵa baǵyttalǵan.
Eske salaıyq, buǵan deıin Katon-Qaraǵaıda ekologııalyq tepe-teńdikti saqtaý úshin týrıster sanyn shekteý máselesi kóterilgen bolatyn.
