Degenmen Batys Qazaqstan oblysyndaǵy epıdemıologııalyq jaǵdaı turaqty deýge bolady. Jyl basynan beri óńirde oba, tyrysqaq, qutyrý, týlıaremııa, sibir jarasy, búırek sındromdy gemorragııalyq qyzba, sondaı-aq ish súzegi, dıfterııa, qyzamyq, sirespe, bezgek sııaqty qaýipti juqpaly aýrýlar tirkelgen joq. «Bul nátıjege sala mamandarynyń turaqty baqylaýy men profılaktıkalyq sharalary arqasynda jetip otyrmyz» deıdi Batys Qazaqstan oblystyq sanıtarııalyq-epıdemıologııalyq baqylaý departamenti basshysy Dınara Jańabergenova.
Salystyra qarasaq, 2024 jyldyń sáıkes kezeńimen salystyrǵanda ishek ınfeksııasy, qyzylsha, menıngokok, A vırýsti gepatıt, kókjótel, brýsellez, týberkýlez syndy juqpaly aýrýlar azaıǵan. Ásirese týberkýlez dertiniń 1,4 esege tómendegeni qýantady.
- 6 aı ishinde oblys aýmaǵynda 110 belsendi týberkýlez jaǵdaıy tirkeldi. Bul 100 myń halyqqa shaqqanda 15,8 kórsetkishin quraıdy. 2024 jyly bul kórsetkish – 158 jaǵdaı bolyp edi. Aýrýdyń asqynǵan túri kezdespedi, - deıdi Dınara Oljabaıqyzy.
Aıta keter jáıt, óńirde janýardan alǵan jaraqat sany ósken eken. Byltyr alǵashqy 6 aı ishinde osyndaı 1296 oqıǵa tirkelse, bıyl 1333 adam dárigerge qaralǵan. Onyń ishinde 942 adam - ıtten, 341 adam – mysyqtan, 4 adam – jylqydan, 10 adam – iri qaradan, 35 adam – basqa da janýarlardan jaraqat alypty. Biraq abyroı bolǵanda munyń arasynda qutyrý sekildi qaýipti derttiń qatysy joq bolyp shyqty.
Mal baqqan eldiń bir qaýpi – brýsellez aýrýy. Bıyl bul dert Aqjaıyq, Báıterek, Qaratóbe jáne Tasqala aýdandarynda bir-birden ǵana tirkelgen. Al negizinen kemirgishter arqyly taraıtyn búırek sındromdy gemorragııalyq qyzba derti jyl basynan beri 12 adamǵa juǵypty. Atap aıtsaq, Báıterek aýdanynda – 2, Bórli aýdanynda – 7, Oral qalasynda – 3 adam osyndaı dıagnozben dárigerge júgingen. Mamandar yqtımal aýrý oshaqtaryn anyqtap, deratızasııa jáne dezınseksııa jumysyn júıeli júrgizip keledi. Turǵyndardyń sanıtarııalyq saýatyn arttyrý, juqpaly aýrýdyń taralýyna jol bermeý, aldyn alý sharalaryn túsindirý isi de qatar júrip jatyr.
- Bizdiń departament barlyq buqaralyq aqparat quraly arqyly belsendi nasıhat júrgizemiz. Jyl basynan beri 9 brıfıng ótkizdik. 81 beınerolık túsirip, 187 ınfografıka, 59 jadynama men plakat ázirledik. Olar halyqqa barynsha taratyldy. Sonymen qatar bizdiń mamandar telearnada – 29, radıoda – 17 márte shyǵyp, baspasózde – ondaǵan maqala jarııaladyq. Qoǵamdyq oryndarda sanıtarııalyq talaptar týraly aqparattyq buryshtar ornatyldy. Bilim berý uıymdarynda, eńbek ujymdarynda jáne halyq kóp shoǵyrlanǵan jerlerde 258 semınar, 189 dáris uıymdastyrdyq. О́ıtkeni halyqtyń sanıtarııalyq-epıdemıologııalyq salamattyǵy – medısına qyzmetiniń ǵana emes, búkil qoǵamnyń ortaq mindeti. Saýatty adam saý bolady, - deıdi Batys Qazaqstan oblystyq sanıtarııalyq-epıdemıologııalyq baqylaý departamenti basshysy.
Batys Qazaqstan oblysy
