Eldegi turǵyn úıdiń basym bóligin shamamen 93 paıyzyn jeke qurylys kompanııalary salǵan. Naryqtaǵy básekeniń kóp bóligi jekemenshik sektordyń ıeliginde bolyp tur. Jalpy alty aı ishinde 807 kópqabatty úı, 14 844 jeke turǵyn úı men 22 jataqhana boı kóterip, 72 myńnan astam jańa páter el ıgiligine berildi.
Almaty qalasy turǵyn úı keshenderiniń sany boıynsha kósh bastap tur. Jarty jylda munda 242 jańa nysan salynsa, Astanada 77, Almaty oblysynda 61 úı turǵyzylǵan. Alaıda jańa páter sany jaǵynan Astana alda: elordada 19,1 myń páter berilse, Almatyda bul kórsetkish 14,8 myń. Mundaı aıyrmashylyqty mamandar Almatydaǵy qurylys bıiktigine qoıylǵan shekteýlermen baılanystyrady.
Jeke turǵyn úıler boıynsha Almaty oblysy aıqyn basymdyqqa ıe: munda jyl basynan beri 2,4 myńnan astam jeke úı salynǵan. Al kópqabatty úı sany az óńirlerdiń qatarynda Atyraý, Shyǵys Qazaqstan jáne Mańǵystaý oblystary bar — bul aımaqtarda 10–13 úı ǵana turǵyzylǵan.
Qurylys qarqyny ár óńirde ártúrli. Túrkistan, Aqmola oblystary men Shymkentte ósim baıqalsa (tıisinshe +18,2 %, +15 % jáne +14,5 %), Qaraǵandy men Abaı oblystarynda kerisinshe, tómendeý tirkelgen, 11-12 paıyzǵa deıin.
Aıta keterligi, turǵyn úı qurylysyna salyqtyń áseri de ózekti máselelerdiń biri. Qosylǵan qun salyǵynyń (QQS) kóterilýi qurylys materıaldarynyń ózindik qunyna áser etýi múmkin. Alaıda Premer-mınıstr Oljas Bektenov salyq kodeksindegi ózgerister baǵanyń kúrt ósýine ákelmeıdi dep málimdedi. Degenmen, naryqtaǵy jaǵdaı, qurylys logıstıkasy men ınfraqurylymdyq shyǵyndar baǵaǵa óz áserin tıgizetinin eskergen jón.
Jalpy alǵanda, 2025 jyldyń alǵashqy alty aıyndaǵy kórsetkishter qurylys sektorynyń oń serpinge ıe ekenin baıqatady. Alaıda óńirler arasyndaǵy teńsizdik, turǵyn úı baǵasynyń ósý qaýpi jáne ınfraqurylymǵa qatysty túıtkilder salada sheshimin kútken máseleler retinde qala bermek.
