Foto: Farabi University
Buǵan deıin Prezıdent tóraǵalyǵymen ótken Úkimettiń keńeıtilgen otyrysynda QQS-ny 12-den 20 paıyzǵa kóterý josparlanyp otyrǵany aıtylǵan. Alaıda memleket basshysy bıznes ókilderimen kezdesýinde bul mólsherdiń tym joǵary ekenin aıtyp, Úkimetke qaıta pysyqtaýdy tapsyrǵan edi. Osy tapsyrmadan keıin Úkimet QQS mólsherin 16 paıyzǵa tómendetýdi usyndy. Jańa Salyq kodeksinde osy usynys qoldaý tapty. Jańa Salyq kodeksi azamattar men bıznes úshin ońtaılandyrylyp, ádiletti salyq tóleýge yntalandyrýdy kózdeıdi. Prezıdent qol qoıǵan Salyq júıesiniń ózge de jańashyldyqtaryn Ulttyq ekonomıka mınıstrligi Salyq jáne keden saıasaty departamentiniń dırektory Erlan Saǵnaev túsindirip berdi.
«Jańa salyq kodeksiniń negizgi jańalyǵy salyq eseptiliginiń kólemin 30 paıyzǵa qysqartyp, salyq sanynyń 20 paıyzǵa azaıýy, KTS pen QQS dıfferensıasııasy, qoldanystaǵy arnaýly salyq rejımderin ońtaılandyrý, sán-saltanat salyǵyn engizý. Máselen, biryńǵaı jer salyǵy qysqartylyp, jeke tólemaqylar boıynsha mólsherlemeler men alymdardyń sany kemitildi. Korporatıvtik tabys salyǵyna jeke toqtalsam, 20 paıyz deńgeıinde saqtalady. Dese de saralanǵan salyqtyq mólsherleme túsinigi de bar. Máselen eń joǵarǵy mólsher oıyn bıznesi men bankterge (bıznes sýbektilerin kredıtteýdi qospaǵanda) – 25 paıyz qoıylǵan. Al áleýmettik salalar, bilim berý, medısına, mádenıet jáne sport salalary úshin 2026 jyly 5 paıyz mólsherinde belgilenip, 2027 jyly 10 paıyzǵa deıin ulǵaıady. Aýyl sharýashylyǵy taýaryn óndirýshilerge 3 paıyz jeńildetilgen mólsherleme qalady», dedi Erlan Saǵnaev.
Sondaı-aq, Ulttyq ekonomıka mınıstrligi Salyq jáne keden saıasaty departamentiniń dırektory QQS-tan bosatylǵan salalar týraly da aıtyp berdi.
«Jańa Salyq kodeksindegi ózgeriske saı QQS-tiń bazalyq mólsheri 12 paıyzdan -16 paıyzǵa ósedi. Densaýlyq saqtaý salasy úshin tómendetilgen mólsher qoıyldy. QQS atalǵan sala úshin 2026 jyldan bastap - 5 paıyz, 2027 jyldan bastap – 10 paıyz deńgeıinde bolady. Úkimet aıqyndaıtyn tizbe boıynsha orfandyq jáne áleýmettik máni bar aýrýlardy emdeý mólsherlemesi 0 paıyz bolady», dedi Erlan Ermekuly.
Aıta keteıik, jańa Salyq kodeksi 2026 jyldyń 1 qańtarynan bastap kúshine enedi.
